17 tamyzdan bastap Qazaqstan balabaqshalarynda kezekshi toptar jumys istei bastaidy. Bul týraly búgin Ortalyq kommýnikatsiialar qyzmetinde ótken brifingide QR Bas memlekettik sanitarlyq dárigeri Aijan Esmaǵambetova aitty, dep habarlaidy QazAqparat.
«Osy ýaqytqa deiin qyzmetine tyiym salynbaǵan nysandar dúisenbiden ári jumysyn jalǵastyra beredi. Osy nysandardan bólek, saýda jáne oiyn-saýyq ortalyqtary men saýda úileriniń jumysy qaita jandanady. Eger buǵan deiin saýda ortalyqtarynda dárihanalar men azyq-túlik dúkenderi ǵana jumys istese, dúisenbiden bastap saýda ortalyqtarynda býtikterde de jumys istei alady», - deidi Aijan Esmaǵambetova.
Sondai-aq, saýda jelileri men ashyq bazarlar jumys istei bastaidy.
«Sonymen qatar, sulýlyq salondarynyń, sulýlyq ortalyqtarynyń, shashtarazdardyń, SPA-ortalyqtarynyń jumysyna ruqsat etiledi. Bul nysandardyń barlyǵyna qatań talaptar qoiylady. Biznes nysandary osy talaptarǵa sai bolýy kerek. Talaptar eń aldymen, karantindi jeńildetýdiń alǵashqy kezeńderinde nysanda adamdardyń kóp jinalmaýyna, áleýmettik qashyqtyqtyń qamtamasyz etilýine baǵyttalǵan», - deidi ol.
Eresekter men balalarǵa arnalǵan bilim berý ortalyqtary da ashylatynyn aita ketý kerek.
«Sonymen birge, biz osy ortalyqtardyń qyzmetin shekteimiz, iaǵni bir topta 5 adamnan aspaýy kerek. Al sabaqtar aldyn ala jazylý, kúsheitilgen dezinfektsiia jáne áleýmettik qashyqtyqty saqtaý arqyly júrgizilýi kerek. Mektepke deiingi mekemelerdiń jumysyna da ruqsat etiledi, birinshi kezeńde olar kezekshi toptar túrinde jumys isteidi. Ár jasqa 15 baladan aspaityn kezekshi toptar qurylady», - dedi Bas memlekettik sanitarlyq dáriger.
Budan buryn habarlanǵandai, 13 tamyzda QR Premer-Ministri Asqar Maminniń tóraǵalyǵymen ótken memlekettik komissiia otyrysynda Karantin sharalaryn kezeń-kezeńimen alyp tastaý jospary bekitildi.
