QR bas memlekettik sanitar dárigeri Aijan Esmaǵambetova karantin rejimin saqtamaǵan turǵyndar men kásipkerlerdiń qalai jazalanǵanyn aityp berdi, dep habarlaidy QazAqparat.
«Qazirgi ýaqytta elimizdiń barlyq óńirinde karantindik sharalardyń saqtalýyn tekseretin 644 monitoringtik top bar. Olar ákimdik janynan qurylǵan jáne quramynda jergilikti atqarý organdarynyń, politsiia qyzmetiniń jáne sanitarlyq qyzmettiń ókilderi bar. 5 shildeden búgingi kúnge deiin monitoringtik toptar karatin jaǵdaiynda jumys istep jatqan 25 438 nysandy tekserdi. Onyń 12 protsentinde nemese 3 myń nysanda karantin talaptarynyń buzylǵany anyqtaldy», - dedi spiker Ortalyq kommýnikatsiialar qyzmetinde ótken onlain brifingte.
Onyń aitýynsha, karantinniń alǵashqy aptasynda monitoring toptary karantin rejimin buzǵandardy jaýapqa tartpai, túsindirý jumystaryn ǵana júrgizgen. Osylaisha, monitoring toptary kásipkerlerge 16 myń usynym bergen. 742 nysan ózdiginen karatindegi jumysyn toqtatqan.
«Tekserýde anyqtalatyn negizgi buzýshylyqtar – maska taqpaý, ara qashyqtyq saqtamaý, qyzmetkerlerdi maskamen jáne antiseptikpen qamtamasyz etpeý jáne naýryz aiynan beri tyiym salynǵan jappai buqaralyq sharalar ótkizý faktileri de tirkeldi. Odan bólek, sanitarlyq-epidemiologiialyq baqylaý organdary jospardan tys 270 tekserý júrgizip, barlyǵynan derlik quqyqbuzýshylyq tapqan. Tekserý qorytyndysy boiynsha ákimshilik quqyqbuzýshylyq týraly 1036 hattama toltyrylyp, 202 uiǵarym berilgen. 23 kásipkerlik nysannyń jumysy toqtatyldy. Tekserý aiasynda anyqtalǵan quqyqbuzýshylyqtar úshin 457 laýazymdy tulǵa 65 mln teńgege jaýapqa tartyldy», - dedi A. Esmaǵambetova.
Jeke tulǵalar arasynda 5 shildeden bastap, 495 adamǵa 20 mln astam teńge aiyppul salyndy. Ásirese, Almaty qalasy men Túrkistan oblysynyń turǵyndary kóp ereje buzǵan. Qalǵan óńirlerdiń barlyǵynda birli-jarym quqyqbuzýshylyqtar tirkelgen.
