Sanitarlyq-epidemiologiialyq baqylaý komiteti «qoiý qyzyl» aimaqtarda saýda-oiyn-saýyq ortalyqtary 9 tamyzdan bastap qandai rejimmen jumys isteitini týraly aqparat jariialady, dep habarlaidy "Ult aqparat".
Komitettiń saityna jariialanǵan aqparat boiynsha, «qoiý qyzyl» aimaqtarda 9 tamyzdan bastap «Ashyq kóshbasshysy» mártebesi bar nysandarǵa saǵat 00.00-ge deiin, Ashyq júiesindegi basqa nysandarǵa saǵat 22.00-ge deiin jumys jasaýǵa ruqsat berilip otyr.
Bas sanitar dárigerdiń buǵan deiingi qaýlysynda Ashyq júiesindegi saýda-oiyn-saýyq ortalyqtary «jasyl» jáne «sary» aimaqtarda shekteýsiz jumys rejimine jiberilse, «qyzyl» aimaqtarda senbi jáne jeksenbi kúnderi saǵat 10.00-den 22.00-ge deiin jumys isteýge ruqsat berilgen bolatyn. Al «qoiý qyzyl» aimaqta saǵat 07.00-den 20.00-ge deiin qyzmet kórsete alatyny aitylǵan edi. Endigi sheshim boiynsha atalǵan nysandardyń jumys ýaqyty 2 saǵatqa uzartylyp otyr degen sóz.
Komitet jariialaǵan málimette 2 tamyzdan bastap Nur-Sultan, Almaty, Shymkent, Atyraý jáne Qaraǵandy qalalarynda «qoiý qyzyl» statýsqa sai shekteý sharalary engizilgeni aitylǵan.
«№33 BMSDQ-nyń 11-tarmaǵyna sáikes tiisti aýmaqtaǵy kóliktegi Bas memlekettik sanitariialyq dárigerler «Ashyq» jobasyn iske asyrý máseleleri boiynsha atalmysh Qaýlyny basshylyqqa alady jáne «jasyl», «sary», «qoiý qyzyl» aimaqtardaǵy jobaǵa qatysýshylarǵa qatysty karantindik sharalardy qatańdatý týraly sheshim qabyldaýǵa quqyly emes», - dep jazylǵan resmi aqparatta.
«Qoiý qyzyl» aimaq statýsy bir apta infektsiialyq tósekterdiń júktelim kórsetkishi 70%-dan asqan jáne 100 myń turǵynǵa shaqqanda 200-den joǵary bolǵan óńirlerge beriledi.
