Foto: zakon.kz
Qaraǵandy qalasynda jasóspirimder arasyndaǵy qatygezdik qoǵamdy dúr silkindirdi. Alty kámeletke tolmaǵan jasóspirim qatarlas qyzdy aiaýsyz soqqyǵa jyǵyp, aýyr jaraqat salǵan. Oqiǵanyń beinejazbasy áleýmettik jelilerde tarap, kópshiliktiń ashý-yzasyn týǵyzdy, dep habarlaidy Ult.kz.
Politsiia málimetinshe, janjal bastapqyda jas jigit pen qyzdyń arasynda týyndaǵan. Keiin oǵan taǵy birneshe jasóspirim qosylyp, jábirlenýshige qasaqana dene jaraqatyn salǵan. Soqqy saldarynan qyzdyń denesi qantalap, aitarlyqtai zardap shekken.
Jábirlenýshiniń ata-anasy quqyq qorǵaý organdaryna aryz túsirip, qylmystyq is qozǵaldy. Tártip saqshylary alty kúdiktini anyqtap, bólimshege jetkizdi. Janjaldy bastaǵan eki jasóspirim tergeý izoliatoryna qamaldy.
Sonymen qatar, kámeletke tolmaǵandardyń ata-analaryna qatysty balalardy tárbieleý mindetterin tiisinshe oryndamaǵany úshin ákimshilik sharalar qoldanyldy. Bul jaǵdai jasóspirimder arasyndaǵy quqyq buzýshylyqtyń aldyn alý jónindegi keńeste de qaraldy.
Tergeý aiaqtalǵan soń kináli dep tanylǵan jasóspirimderdi arnaiy bilim berý uiymyna jiberý máselesi qarastyrylmaq.
Bul oqiǵa qoǵamda jasóspirimder arasyndaǵy zorlyq-zombylyqtyń aldyn alý, ata-ana jaýapkershiligi men tárbie máselesin qaita kóterip otyr.
