Qaraǵandy qalasynyń mádeniet jáne demalys saiabaqtary basqarmasy «Amerikalyq taýlar» attraktsionyndaǵy vagondardyń biri birneshe metr biiktiktegi relste nelikten turyp qalǵanyn túsindirdi. Oqys oqiǵa osydan eki kún buryn bolǵan edi, dep habarlaidy QazAqparat.
«Jelidegi kerneýdiń tómendeýine bailanysty vagondy ózdiginen syrǵanaýdan qorǵaýdyń avtomatty júiesi iske qosylǵan, bul - qalypty jaǵdai. Qyzmetkerler arnaiy satylarǵa kóterilip, júieni mehanikalyq túrde óshirdi jáne vagon avtomatty túrde iske qosylatyn jerge tústi. Vagonda 4 adam bolǵan, olar qandaida bir narazylyq bildirmegen. Áleýmettik jelilerde jazylǵandai, eshkim attraktsion jolaýshylaryn baspaldaqtarmen nemese relstermen túsirgen joq», - dep túsindirdi Qaraǵandy qalasynyń mádeniet jáne demalys saiabaqtary basqarmasynan.
Osydan keiin Qaraǵandyǵa attraktsionnyń tehnikalyq jaǵdaiy týraly qorytyndy beretin táýelsiz saraptama komissiiasynyń qyzmetkerleri keldi.
«Qandaida bir aqaýlar anyqtalǵan jaǵdaida attraktsiondardyń kez kelgeni tolyq qalpyna keltirilip, qaita saraptamadan ótkenge deiin jabylady. «Amerikalyq taýlar» attraktsionyndaǵy bul jaǵdai shtattyq bolǵandyqtan, barlyq attraktsiondardy toqtatýdyń qajeti joq», - dep tolyqtyrdy mekemeden.
Basqarmadan málim etkenindei, demalys maýsymynyń basynda barlyq attraktsiondar arnaiy firmalardyń saraptamasynan ótedi. Nysandar jekemenshik ieliginde bolǵandyqtan, tiisti kompaniialar attraktsion operatorlary úshin nusqaýlyq pen jattyǵýlar da júrgizedi. Mamandandyrylǵan firmalar attraktsion operatorlaryna oqý sertifikattaryn beredi, sondai-aq olardy parktiń tehnikalyq qaýipsizdik qyzmeti tekseredi.
Biylǵy maýsymnyń basynda barlyq saiabaqtardaǵy oiyn-saiyq nysandary oń saraptama nátijelerin alǵan. Degenmen, osy oqiǵaǵa bailanysty kásipkerlerge qosymsha saraptama alý týraly uiǵarymdar berilmek.
