Qaraǵandy qalasyndaǵy telearnanyń jýrnalisi blok bekette qyzmetin atqaryp turǵan politseige tosynsyi jasady. Qyzmet babymen úiine sirek baratyn politseige tikelei efirde kishkentai qyzy habarlasty, dep habarlaidy "Ult aqparat".
«SARYARQA» aimaqtyq telearnasynda respýblikalyq «Almaty-Ekaterinbýrg» tasjolyndaǵy blokbekettiń jumysy týraly reportaj shyqty. Telearna tilshileri meditsina qyzmetkerleri men politseilerden tótenshe jaǵdai kezinde qalai jumys istep jatqany týraly suraǵan bolatyn. Sebebi dál osy mamandyq ieleri koronavirýspen kúreste aldyńǵy shepte tur. Jol-patrýl politsiia qyzmetkeri, politsiia aǵa leitenanty Áset Qairatov TJ rejimin engizgennen beri qyzmet atqarýdyń kúsheitilgen túrine aýysqanyn jáne otbasyn sirek kóretinin aitqan. Tártip saqshylary demalyssyz jáne táýligine 12 saǵattan jumys atqarýda.
Politsei jýrnalistiń «Otbasyńyzdy qanshalyqty jii kóre alasyz?» degen suraǵyna «Óte sirek kóremin. Tańerteń qyzmetke ketip bara jatqanda qyzym áli uiyqtap jatady, keshke qaityp oralǵanda áielim balamdy uiyqtatyp jatady» dep jaýap berdi.
Tártip saqshysynyń bul sózinen soń jýrnalister oǵan tosynsyi jasady. Tikelei efirde oǵan 4 jasar qyzy Ailin habarlasty.
«Ákeshim, sen tańerteń de, keshke de jumystasyń. Úige qashan oralasyń? Men sizdi qatty saǵyndym!» deidi ol.
Ákesi oǵan «Men de seni qatty saǵyndym. Qyzym, men de seni qatty jaqsy kóremin!» dep jaýap berdi.
Politsiia aǵa leitenanty Áset Qairatov kútpegen jerden osyndai tosyn syi ony qatty tolqytqanyn jetkizdi. Politsiia qyzmetkeri jýrnalisterge qiyn kezeńde oǵan osyndai baqytty sát syilaǵany úshin alǵysyn bildirdi.
