Qaraǵandy oblysynda koronavirýstyq infektsiia aýrýshańdyǵy tómendedi. Kún saiynǵy ósim kórsetkishi 1,5% deńgeiinde bolyp otyr. Jedel járdem shaqyrýlarynyń sany úsh esege qysqardy. Qazir gospitaldarda tósek-oryndardyń jartysy bos, dep habarlaidy "Ult aqparat".
Sonymen qatar, oblys ákimi Jeńis Qasymbek kúzgi-qysqy kezeńde KVI qaita órshýiniń ekinshi tolqynyna daiyndyqty ýaqytynda bastaýdy tapsyrdy. Epidemiologiialyq jaǵdaidyń jaqsarýy bosańsýymyzǵa sebep bolmaýy tiis, dep málimdedi ol.
«Búgingi tańda Qaraǵandy oblysynda 8 058 juqtyrý oqiǵasy tirkelgen. Aýrýdyń ósýi 1,5% quraidy. 81 adamda aýrý ólimmen aiaqtaldy. 4 926 naýqas saýyǵyp ketti. Sońǵy eki aptadaǵy taldaý epidjaǵdaidyń jaqsarǵanyn, aýrýshańdyq tómendegenin kórsetedi. Tósek qorynyń júktemesi de azaidy. Infektsiialyq kereýetter 47%-ǵa, provizorly kereýetter 50% júktememen jumys isteýde», - dep habarlady Densaýlyq saqtaý basqarmasynyń basshysy Erjan Nurlybaev onlain rejiminde ótken apparattyq keńeste.
Ol dári-dármekpen qamtamasyz etýdiń túbegeili jaqsarǵanyn da atap ótti. Statsionarlarda qajetti preparattardyń jetkilikti qory bar. Oblys emhanalaryna úi jaǵdaiynda pnevmoniiadan emdeletin naýqastardy qamtamasyz etý úshin antibiotikter tústi. Sondai-aq dárihanalyq jelide de tapshylyq máselesi sheshildi.
Oblysta densaýlyq saqtaý júiesin KVI ekinshi tolqyny múmkin bolǵan jaǵdaida kúzgi-qysqy kezeńdegi jumysqa daiyndaý jospary ázirlendi. Ol infraqurylymdy damytý, emdeý mekemeleriniń materialdyq-tehnikalyq bazasyn jaqsartý, turaqtandyrý qoryn qurý jónindegi sharalardy qamtidy.
Qosymsha 1 500 pýlsoksimetr, 500 ottegi kontsentraty, 302 ÓJJ-apparatyn satyp alý josparlanýda, dep habarlady Erjan Nurlybaev. Sondai-aq kompiýterlik tomograftar men sandyq rentgen-apparattardyń sany artady, PTR-diagnostika jelisi keńeitiledi.
Meditsina kadrlarynyń jetispeýshiligine qatysty másele sheshilýde. Vedomstvo basshysynyń aitýynsha, biyl meditsinalyq JOO-nyń 360 túlegi jumysqa ornalasady. Oblystyń qalalary men aýdandarynda jas mamandarǵa baspana beriledi.
