Osakarov aýdanynda Jumyspen qamtýdyń jol kartasy boiynsha 400-ge jýyq jumys orny ashyldy, dep habarlandy oblys ákimdiginiń resmi saitynda.
«Jumyspen qamtýdyń jol kartasy» baǵdarlamasy Osakarov aýdanynda ekpindi túrde qarqyn alýda. Joldar men mektepter jóndeledi, kósheler men mádeniet jáne demalys saiabaqtary abattandyrylady. JQJK boiynsha 364 jumys orny ashylady. Barlyǵy 36 jobany júzege asyrý josparlanǵan. Aýdannyń tynys-tirshiligimen Qaraǵandy oblysynyń ákimi Jeńis Qasymbek tanysyp qaitty.
Osakarov aýdanyn damytýǵa «Aýyl - el besigi» memlekettik baǵdarlamasy da kómektesýde. Mysaly, kenttiń 54 kóshesinde joldar jóndeledi. Al Esil okrýginde jaz sońyna deiin sý qubyryn jóndeý jumystary aiaqtalýy tiis.
- Bul okrýgte eki myńǵa jýyq adam turady. Halyq aýyz sý tapshylyǵyna bailanysty qiyndyqtarǵa tap boldy, sýdyń sapasyna shaǵymdanady. Jóndeý jumystarynan keiin turǵyndar úzdiksiz sýmen qamtamasyz etiledi, - deidi Osakarov aýdanynyń ákimi Núrken Qobjanov.
Osakarovta jol jóndeýden basqa, mádeniet jáne demalys saiabaǵyn abattandyrý jumysy júrip jatyr. Mundaǵy qurylys jumystary Jumyspen qamtýdyń jol kartasy sheńberinde iske asyrylýda.
- Biz tóselgen kesek tastardy aýystyramyz, ǵashyqtar alleiasyn, shaǵyn fýtbol alańyn jasaimyz, jaryqtandyrý tiregin ornatamyz, - deidi qurylys kompaniiasynyń direktory Natalia Kobzeva.
Oblys ákimi jumys sapasyna nazar aýdarý kerektigin atap aitty.
- Turǵyndar munda jaily demalýy kerek. Balalar alańyn jabdyqtaý múmkindigin de qarastyryńyzdar, - dedi Jeńis Qasymbek.
Sondai-aq ol merdigerler jumys kestesinen qalmai, jóndeýdi josparlanǵan merzimde aiaqtaýy kerektigin aitty.
Óńir basshysy jumys sapary barysynda sonymen birge Pioner balalar úiine de bardy.
Munda 88 tárbielenýshi bar, onyń segizi mektepti bitirip, joǵary oqý ornyna túsýge daiyndalyp júr. Oblys ákimi balalarmen áńgimelesti jáne olarǵa emtihandy sátti tapsyrýdy tiledi.
Sondai-aq Jeńis Qasymbek UBT tapsyrý sharttarymen tanysty. Aýdannyń tirek mektebinde 193 túlek úsh kezeńde testileýden ótedi. Munda dezinfektsiialyq týnnel, maska men antiseptik daiyndaldy. Kireberiste mindetti túrde barlyq túlekterdiń temperatýrasy ólshenedi.
Osakarov aýdanynyń bilim bóliminiń basshysy Ainagúl Aqmaǵanbetovanyń aitýynsha, barlyq sanitarlyq normalar saqtalady.
