«Saryaǵash-Nur-Sultan» baǵytyndaǵy №85 jolaýshylar poiyzynda qyz bala dúniege keldi, dep habarlaidy "Ult aqparat".
«Jolaýshylar tasymaly» kompaniiasy baspasóz qyzmetiniń málimetinshe, 14 aqpanynda poiyz jolaýshysy Anastasiia Grankina «Taraz – Pavlodar» baǵyty boiynsha jolǵa shyqqan. Jol boiynda Kiik-Bosaǵa ýchaskesinde jolaýshy №11 vagonnyń jolserigi Ultýar Ibragimovadan kómek surap, júktiliktiń toǵyzynshy aiynda ekenindigin jáne tolǵaǵy bastalǵandyǵyn habarlady.
«Poiyz brigadasynyń qyzmetkerleri bosanǵan áielge alǵashqy kómek kórsetý boiynsha barlyq qajetti sharalardy qabyldady. Jaqyn stansaǵa jedel járdem shaqyryldy. Meditsina qyzmetkerleri kelgenge deiin poiyz bastyǵynyń mindetin atqarýshy Aldiiar Teńgeshev pen shtab vagonynyń kezekshi jolserigi Zina Kúnisbaeva jolaýshyǵa bosaný kezinde kómek kórsetti.
14.53-te Aqadyr stansasyna jaqyndaǵan shaqta dúnie esigin ashqan qyz balanyń esimin Ámina dep qoidy», delingen habarlamada.
Poiyz Aqadyr stansasyna kelgennen keiin jedel járdem qyzmetkerleri jańa týǵan náresteni jáne sol balanyń anasyn qarap shyqty. Balanyń jaǵdaiy qanaǵattanarlyq boldy, anasy aýrýhanaǵa jatqyzýdan bas tartty jáne olar sońǵy stansaǵa deiin jol júrip ketti.
