Qaraǵandy oblysynyń Jańaarqa kentinde kópqabatty úidiń birinshi qabatynda úsh bólmeli páter órtenip ketti, dep habarlaidy "Ult aqparat".
Órt sóndirýshiler joǵarǵy qabattaǵy páterlerdiń birinde es-tússiz jatqan eki áieldi taýyp aldy. Olardyń biri qaitys boldy, ekinshisi aýyr halde.
«25 maýsym kúni saǵat 19:22-de Qaraǵandy oblysy, Jańaarqa aýdany, Jańaarqa kentinde bolǵan órt týraly habarlama kelip tústi. Órt sóndirý bólimsheleri kelgen sátte úsh qabatty turǵyn úidiń 1-qabatyndaǵy aýdany 60 sharshy metr úsh bólmeli páterdi ot sharpyǵany anyqtaldy.
Janyp jatqan páterden baspaldaq marshy boiynsha 4 adam, onyń ishinde 3 bala qutqaryldy. Sondai-aq, joǵarǵy qabattardyń páterlerin tekserý kezinde 3-qabattaǵy páterlerdiń birinen kómirqyshqyl gazymen ýlaný belgileri bar es-tússiz jatqan eki áiel tabyldy. Zardap shekkenderdiń biri, 1969 jyly týǵan áiel aýrýhanada qaitys boldy, 1961 jyly týǵan ekinshi áieldiń jaǵdaiy aýyr. Zardap shekken úi turǵyny kórý qabileti nashar múgedek, al qaitys bolǵan kelinshek onyń kómekshisi bolǵan», - dep habarlady Qaraǵandy oblysy TJD baspasóz qyzmetinen.
Órt saǵat 20:11-de sóndirildi. Onyń shyǵý sebebi anyqtalýda. Oqiǵa ornynda Qaraǵandy oblysy TJD synaq zerthanasynyń mamandary jumys isteidi.
