Qaraǵandy oblysynyń Saran qalasynda keiýana sómkesin tartyp almaq bolǵan qaraqshyny soqqynyń astyna alǵan, dep habarlaidy "Ult aqparat".
30 mamyrda Qaraǵandy oblysy Saran qalasynyń politsiia bólimine 80 jastaǵy áiel túrli jaraqattarmen meditsinalyq mekemege jatqyzylǵany týraly habarlama túsken. Politseiler anyqtaǵandai, zeinetker dene jaraqatyn qaraqshyǵa qarsylyq kórsetý kezinde alǵan.
Ájeidiń aitýynsha, tańerteń ol shirkeýge bet alyp, eki úidiń arasynan ótip bara jatqanda, oǵan belgisiz adam shabýyl jasaǵan. Kúsh qoldana otyryp, keiýanadan sómkesin tartyp almaq bolǵan. Alaida zeinetker esh qoryqpastan qaraqshyǵa tótep bergen, ony birneshe ret uryp jibergen. Keiin ózi qulap qalyp, jaraqat alǵan. Mundai qatty toitarysty kútpegen qaraqshy qashyp ketken.
«Atalǵan fakti boiynsha QR QK 191-baby («Tonaý») boiynsha qylmystyq is qozǵaldy. 1 maýsymda jedel-izdestirý sharalary barysynda kriminaldyq politsiia qyzmetkerleri kúdiktini – 25 jastaǵy er adamdy ustady. Ol kinásin tolyq moiyndady. Tergeý júrip jatyr», - dep habarlady Qaraǵandy oblysy PD baspasóz qyzmetinen.
