Qaraǵandy-Balqash-Almaty avtomobil joly 2023 jyly tolyǵymen paidalanýǵa beriledi. Bul týraly QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
«El astanasy Nur-Sultan qalasy men óńirlerdi «sáýleli printsip» boiynsha bailanystyratyn joǵary jyldamdyqty 4 jolaqty avtomagistral qurylysy jalǵasady. Kókshetaý, Pavlodar jáne Qaraǵandy baǵytyndaǵy jumystar aiaqtaldy. Qazirgi ýaqytta qurylys jumystary Qaraǵandydan Qapshaǵaiǵa deiingi ýchaskede iske asyrylýda. Biyl uzyndyǵy 363 shaqyrym bolatyn Qaraǵandy-Balqash ýchaskesindegi negizgi jumystardy aiaqtaý kózdelgen», - dedi Berik Kamaliev Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, uzyndyǵy 288 shaqyrym bolatyn «Balqash-Býrylbaital» ýchaskesin rekonstrýktsiialaý jumysyna koronavirýs pandemiiasy keri áserin tigizdi. Iaǵni, jekelegen sheteldik kompaniialar jumysyn jalǵastyra almady. Degenmen, qazirgi ýaqytta Halyqaralyq qaita qurý jáne damý banki qarjylandyratyn bul jobany basqa merdigerler qolǵa alyp, jumys istep jatyr.
«Jalpy, Memleket basshysy tapsyrǵandai, Qaraǵandy-Balqash-Almaty dálizin tolyqtai 2023 jyly aiaqtaimyz»,- dedi vitse-ministr.
