Qara betperde taǵyp, muqtaj jandardy qýantyp júrgen jigit qaterli isikke shaldyqqan balanyń armanyn oryndady, - dep habarlaidy Massaget.kz portaly.
Qara betperde kiip qaiyrymdylyqpen ainalysyp júrgen jigit aýyr naýqasqa shaldyqqan on jastaǵy balaqaidy qýantty. Betperde kigen jigittiń aitýynsha, aqpan aiynyń basynda eriktiler bir otbasynyń aýyr jaǵdaiyn aitqan. Bul otbasy "vremianka" atalyp ketken shaǵyn úidiń bir bólmesin jalǵa alyp turady. Aiyna 25 myń teńge tóleidi. Úi iesiniń tórt balasy bar. Ózi úshinshi toptaǵy múgedek, kózi durys kórmeidi. Soǵan qaramastan 28 jyldan beri bazarda arba súirep, otbasyn asyrap júr. Áieli úide balalaryna qaraidy.
Al úshinshi uly qaterli isikke shaldyqqan. Qazir isik úshinshi satyǵa ótken, em alyp júr. Qaiyrymdy jigit otbasynyń jaǵdaiyn kózimen kórdi. Beinejazbaǵa túsirip aldy. Video Instagram-daǵy Chelovekvmaskee paraqshasynda jariialandy.
"Úsh jyldan beri tek aýrýhanany kórdim. "Áli de basyńda isik bar" dedi, himiia alyp jatyrmyz" dep jylaǵan balanyń videosy kópshiliktiń júregin aýyrtty.
Balaqai ata-anamdy Mekkege aparsam dep armandaidy eken.
"Otbasynyń jaǵdaiyn kózimizben kórgennen keiin kómektesýge bel bailadyq. Ózimizdiń, demeýshileriń jáne halyqtyń da qarjysy bar, balanyń armanyn oryndaýdy uiǵardyq. Alǵashqy barǵanda emine qarajat bersek, ekinshi barǵanda balanyń armanyn aqiqatqa ainaldyrýǵa tyrystyq. Mekkege qajylyqqa sertifikat jáne tórt bólmeli úidiń kiltin tapsyrdyq", - deidi betperde taqqan jigit.
Mundai tosyn syi otbasyn erekshe qýantty. Ásirese balaqailardyń qýanyshynda shek bolmady. Keshe úi iesi jańa qonysyna kóship barypty. Betperde taqqan jigit osy qýanyshty sátti videoǵa túsirip, áleýmettik jelige saldy. Beinejazba jeli qoldanýshylarynyń júregin eljiretti.
Biri "Osy otbasy erekshe júregimdi aýyrtty. Ary qarai ne bolady dep. Osyndai qýanysh buiyrypty. Alla ulyq" dep jazsa, endi biri jigitke aq tilegin jaýdyrǵan.
Qaiyrymdy jigittiń aitýynsha, muqtaj jandarǵa arnaiy esep-shot ashylmaidy.
"Alaida qarjylai qoldaý bildiremin degender óz erikterimen aqsha aýdarady. Al negizgi kómek ózimizden jáne demeýshiler tarapynan bolady. Elimizdiń kez kelgen óńirindegi qiyn jaǵdaiǵa tap bolǵan jandarǵa qol ushyn sozýǵa tyrysamyn", - deidi jigit.
Qupiia jigittiń ózi Oral qalasynan eken.
