2022 jyldyń 5 qańtarynan bastap ASHYQ qosymshasymen «jasyl» mártebesi bar adamdardyń ǵana kirýine ruqsat beriletin nysandar tizimi keńeiedi. Bul týraly Úkimet otyrysynda QR Densaýlyq saqtaý ministriniń mindetin atqarýshy Jandos Búrkitbaev aitty, dep habarlaidy QazAqparat.
«Saýda oiyn-saýyq ortalyqtaryna, saýda úilerine, sport ortalyqtary men fitnes-ortalyqtarǵa, ioga ortalyqtaryna, karaoke, bassein, saýnalarǵa, monshalarǵa, «Qazposhta» bólimshelerine, Halyqqa qyzmet kórsetý ortalyqtaryna ASHYQ qosymshasymen «jasyl» statýsy bar adamdardyń kirýine ruqsat berý jóninde qosymsha aldyn alý is-sharalaryn engizýdi usynamyz», - dedi ol.
Osy rette ministr mindetin atqarýshy atalǵan normany 2022 jyldyń 5 qańtarynan bastap engizýdi usynatynyn atap ótti.
«Halyqtyń vaktsina salýy, jappai revaktsinatsiia jasaýdy arttyrý, sondai-aq usynylatyn epidemiiaǵa qarsy is-sharalar - eldegi koronavirýsqa qatysty jaǵdaidyń nasharlaýyna jol bermeidi», - dedi Jandos Búrkitbaev.
