Qańtar oqiǵasy kezinde urlanǵan qarý jasyrylǵan 120 oryn tabyldy. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Azamattardyń qaýipsizdigin qamtamasyz etý - ishki ister organdarynyń negizgi mindetteriniń biri, osyǵan bailanysty buryn jappai tártipsizdik barysynda urlanǵan qarýdy izdeý men alyp qoiý boiynsha maqsatty jedel-izdestirý is-sharalary jalǵasýda. Búgingi tańda 1640 qarý men 41 myńnan astam oq-dári anyqtalyp, zańsyz ainalymnan alyndy. Onyń ishinde 10 granata atqysh; 6 oq atqysh; 164 avtomat; 362 tapansha; 235 jaraqattaityn jáne gazdy qarý; 78 sýyq qarý bar. Tek ótken 2 apta ishinde 50-den astam qarý-jaraq alyndy. Qarýdy jasyryn saqtaýdyń 120 orny joiyldy», - dedi Sanjar Ádilov Ortalyq kommýnikatsiialar qyzmetindegi brifing barysynda.
Mysaly, onyń aitýynsha, 17 maýsymda Almaty qalasynda alańqaida 7 granata, oqjatary tolyq «IJ» jaraqattaityn tapanshasy men oq-dári jasyrylǵan qarýdy zańsyz saqtaityn jer tabylǵan.
21 maýsymda Talǵar qalasynda 130-dan astam oq-dári men «Kalashnikov» avtomaty alyndy. 22 maýsymda taǵy da Almaty qalasynda «Kalashnikov» avtomaty, 2 ańshylyq myltyq, tútiksheleri bar «F-1» granatasy, 40 oq, 2 brondy keýdeshe, 2 radiostantsiia alyndy.
25 maýsymda Taraz qalasynda turǵyn massivine jaqyn jerde sáikestendirý nómirleri joiylǵan, «Makarov» júiesiniń báseńdetkishti tapanshasy, signaldy revolver men pnevmatikalyq tapansha, jaryq-dybys granatasy men ártúrli kalibrli 60 oq qolǵa tústi.
26 maýsymda Taraz qalasynda «Baikal» myltyǵy, «Strimer» tapanshasy men ártúrli kalibrli 32 oq tabylyp alyndy.
«Júrgiziletin túsindirý jumysynyń nátijesinde azamattar 212 qarýdy óz erkimen tapsyrdy», - dedi ol.
