Ishki ister organdary qańtar oqiǵasy kezinde urlanǵan 343 mln teńgeden astam somanyń jeke menshik múlkin taýyp, tárkilegen. Bul jaiynda Ishki ister ministrligi Tergeý departamenti bastyǵynyń orynbasary Muhtar Qojaev Ortalyq kommýnkatsiialar qyzmetinde ótken brifingide aitty, dep habarlaidy QazAqparat.
«Jappai tártipsizdikterden jábirlenýshi bolyp tanylǵan azamattarǵa kelgen shyǵyndy óndirý aiasynda azamattar men biznes sýbektilerinen urlanǵan 343 mln teńgeden astam somanyń múlki tabylyp, alyndy. Onyń ishinde 12 avtokólik, 317 turmystyq tehnika, 189 zergerlik buiym, 386 uialy telefon, 550-dei ártúrli kiim-keshek, 16 mln teńgeden astam aqshalai qarajat jáne taǵy basqalary bar.
Ishki ister organdary jappai tártipsizdikter barysynda urlanǵan qarýdy izdep taýyp tárkileý boiynsha belsendi jumysty jalǵastyrýda», - dedi ministrlik ókili.
