Sybailas jemqorlyqqa qarsy is-qimyl agenttigi qańtar oqiǵasy boiynsha azaptaýǵa qatysty 360 qylmystyq isti qaraǵan. Antikor basshysy Oljas Bektenov vedomstvonyń alqa otyrysynda osyndai málimet keltirdi, dep habarlaidy QazAqparat.
«Sybailas jemqorlyqqa qarsy qyzmettiń biylǵy alty aidaǵy jumysyna elimizde bolyp jatqan oqiǵalar áser etkeni bárimizge málim. Tek qańtar oqiǵasy boiynsha quqyq qorǵaý organdary qyzmetkerleriniń tarapynan azaptaý men ókilettigin asyra paidalaný faktileri boiynsha agenttik tergeýshileriniń óndirisinde 360 qylmystyq is boldy», - dedi ol.
Agenttik tóraǵasynyń sózine qaraǵanda, qazir quqyq qorǵaý organdary tarapynan azaptaý faktileri boiynsha 170 is tergeýde jatyr.
«Bul sanattaǵy isterdiń sany ótken jyldarmen salystyrǵanda eki ese artyq. Qazirgi tańda 170 is boiynsha tergeý jalǵasyp jatyr. 167-si aiaqtaldy. 23 qylmystyq is ári qarai tergeý úshin prokýratýraǵa joldandy»,- dedi Oljas Bektenov.
