Qazaqstandaǵy qańtar oqiǵasyn tergeý barysynda 83 adam naqty merzimge sottaldy. Bul týraly Bas prokýratýranyń birinshi qyzmet basshysynyń orynbasary Eldos Qilymjanov aitty, - dep habarlaidy Tengrinews.kz.
Eldos Qilymjanovtyń aitýynsha, arnaiy prokýrorlar jappai tártipsizdikke jáne 32 lańkestik aktisine qatysty 53 qylmystyq isti tergep jatyr. Elimizdiń segiz aimaǵynda 30 myńnan asa tergeý áreketteri júrgizilgen. 4 myńnan asa sot-meditsinalyq saraptama taǵaiyndalǵan.
Almaty qalasy, Shymkent, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda buzaqylyq, memlekettik nysandardy órteý, múlikti joiý jáne lańkestik aktiler jasaldy.
"Qazir 349 kúdikti qamaýda. Olardyń qaraqshylyq shabýyldarǵa, ǵimarattardy órteýge, atys qarýyn urlaýǵa, memlekettik nysandar men quqyq qorǵaý organdarynyń qyzmetkerlerine qarýly shabýyl jasaýǵa belsendi qatysqany senimdi túrde anyqtaldy. Árbir ustalǵan adamnyń qylmysqa qatystylyǵy týraly aqparat jetkilikti. Qańtar oqiǵasy boiynsha sotqa barlyǵy 429 qylmystyq is joldandy, olar boiynsha 545 adam sottaldy", - dep qorytyndylady arnaiy prokýror.
Bas prokýratýra málimetinshe, naqty bas bostandyǵynan aiyrý jazasy 83 aiyptalýshyǵa taǵaiyndalǵan.
"Olar bilik ókilderine zorlyq-zombylyq jasaý, bótenniń múlikin joiýǵa bailanysty aýyr qylmystar jasady, budan basqa, zalaldy ótemedi jáne ótelmegen sottylyǵy bar", - dedi Qilymjanov.
