Foto:ken-zhyloi.kz
Búgin qańtar aiynda ótetin UBT bastaldy, ol 10 aqpanǵa deiin jalǵasady. Bul týraly Ult.kz QR Ǵylym jáne joǵary bilim ministrligine silteme jasap habarlaidy.
167 myńǵa jýyq adam UBT-ǵa qatysýǵa ótinish berdi. Olardyń 76,7%-y qazaq tilinde, 23,2%-y orys tilinde, 142 adam aǵylshyn tilinde testileýden ótýge ótinish bildirdi.
Qańtar UBT-syn ótkizýdiń birinshi kúni QR Ǵylym jáne joǵary bilim ministri Saiasat Nurbek Astana qalasyndaǵy testileý ortalyqtarynyń birinde boldy. Ol UBT-nyń ótý barysymen tanysyp, bolashaq stýdentterge sáttilik tiledi.
«Talapkerler ótinish berý barysynda testileý kúnin, ýaqytyn jáne pýnktin ózderi tańdady. Testileýdiń birinshi kúni elimiz boiynsha 2277 adam, onyń ishinde elordada 155 talapker UBT tapsyrady. Eń kóp tańdalatyn beiindik pánder kombinatsiiasy birneshe jyl qatarynan ózgerissiz qalyp otyr. Talapkerlerdiń 17,5%-y «Matematika-Fizika» kombinatsiiasyn tańdaǵan. Iaǵni, bul bolashaq injenerler, mehanikter, muǵalimder, tehnikter men tehnologtar, energetikter, qurylysshylar. Al 17,3%-y «Biologiia-Himiia», 10,3%-y «Matematika-Informatika» pánderin tańdady, sáikesinshe bolashaq meditsina qyzmetkerleri men IT mamandary», - dedi ministr Saiasat Nurbek.
UBT-daǵy pánderdiń sany ózgerissiz qalady, iaǵni úsheýi mindetti jáne ekeýi tańdaý boiynsha pánder. UBT tapsyrmalar sany – 120. Onyń ishinde «Qazaqstan tarihynan» 20 tapsyrma, «Oqý saýattylyǵynan» 10 tapsyrma, «Matematikalyq saýattylyqtan» 10 tapsyrma jáne eki beiindik pán boiynsha 40 tapsyrmadan. Joǵary ball – 140.
Testileý ýaqyty – 4 saǵat (240 minýt). Bul rette erekshe bilim berý qajettilikteri bar balalar úshin usynylatyn qosymsha 40 minýt ýaqyt saqtalatynyn aita ketý kerek.
Esterińizge sala ketsek, qańtardaǵy UBT-ǵa shartty túrde aqyly negizde kúndizgi oqý nysany boiynsha joǵary oqý oryndaryna qabyldanǵan, jazǵy UBT nátijeleri boiynsha shekti ball jinamaǵandar, shyǵarmashylyq BBT-dan basqa daiyndyq baǵyttaryna, pedagogikalyq baǵytqa aqyly negizde aýysqysy keletinder, sondai-aq mektep bitiretin túlekter joǵary oqý oryndaryna aqyly negizde túsý úshin qatysady.
