«Qanshama problemalar bola turyp, bi bilep, ázil aityp júrgenin quptamaimyn»: Aimaǵambetov TikTok-ta belsendi muǵalimder týraly oiyn aitty

Kollaj: Ult.kz

«Basqa memleketterde direktor ár balaǵa besti ákel dep qolyn berip jatady ǵoi. Ol ár basshynyń óz stili ǵoi. Men ózim jas bolsam da meniń stilimde ondai joq. Meniń oiymsha ár laýazymdy tulǵanyń óziniń róli bolýy kerek, ózine tán qasietteri bolady. Sondyqtan meniń oiymsha ýniversitettiń rektory, mekteptiń direktory qanshama sheshilmegen problemalar bola turyp, tań atqannan keshke sheiin  rilz túsirip, bi bilep, túrli ázil aityp júrse, men ózim ony quptamaimyn. Biraq ol osy azamattardyń óz sheshimderi. Men ony quptamaimyn da, túsinbeimin de», - dep aitty Ult.kz tilshisine Ashat Aimaǵambetov.

Biraq depýtat ustazdardyń tanymdyq, aǵartýshylyq maqsatta áleýmettik jelini qoldanǵanyna qarsy emes, kerisinshe oqý-bilimdi nasihattaýdyń joly dep biledi.

«Biraq ár túrli chellendjder bolady ǵoi? Eger olar taqpaq aityp, kitap oqý boiynsha shaqyrsa, ol bólek. Eger óz jumysyna qatysty, balalardyń qyzyǵýshylyǵyn oiatýǵa jumys (áleýmettik jeli arqyly, red) istese onda ol bólek. Ol onyń maqsatyna bailanysty. Eger bostan bosqa keregi joq, túsiniksiz, samotsel deidi ǵoi, podpischik jinaý siiaqty jai ǵana ýaqyt ótkizý, jai ǵana qaljyń bolatyn bolsa, ony árine biz jer men kóktei ekenin túsinýimiz kerek», - dep aitty depýtat.

Aita keteiik, sońǵy kezde orta mektep oqýshylary men joǵarǵy oqý oryndary stýdentterimen birge ustazdar men direktorlardyń arasynda áleýmettik jelide belsendilik artqan.  Kei bir ustazdar el arasynda «TikTok ustaz» degen laqap atqa da ie bolǵan. 

Buǵar deiin Oqý-aǵartý ministrligi Qazaqstandaǵy TikTok-pen birlesip muǵalimderge arnalǵan jobalar da uiymdastyrǵan jaiy bar. 

Jalpy qoǵamda ustazdardyń áleýmettik jelide belsendi bolýyna qatysty túrli pikir bar. Olardyń biri “zamanaýi trendke ilesý arqyly jas býynmen til tabysyp, olardy tárbilei alamsyz” dese, taǵy biri “balalardyń áleýmettik jelige táýeldiliginen qutyla almai otyrǵanda ustazdardyń áleýmettik jelide trend túsirýi durys emes” deidi.

Baljan Jeńisqyzy