Jyl sońynda deiin elimiz boiynsha barlyq mekteptiń beinebaqylaý júiesi QR Ishki ister ministrliginiń Jedel basqarý ortalyǵyna tikelei qadaǵalaýǵa beriledi. Bul týraly QR Ishki ister ministriniń orynbasary Sáken Sársenov málim etti, dep habarlaidy QazAqparat.
«Balalardyń amandyǵy men qaýipsizdigi árqaisymyzdy alańdatatyn másele. Ata-analar balalaryn mektepke, balabaqshaǵa nemese kolledjge jibergende olardyń qaýipsizdigine kóz jetkizýi kerek. Ol úshin tiisti qaýipsiz ortany qurý qajet. Reseidiń Qazan men Permdegi sońǵy oqiǵalaryna bárimiz kýámiz. Teris niettiler mektep pen ýniversitetke op-ońai kirip, balalar men muǵalimderdi atyp tastaǵany, qaýipsizdik máselesin kúsheitý kerektigin ańǵartady. Búginde elimizde oqys oqiǵalardyń aldyn alý úshin, bilim berý oshaqtary «dabyl túimelerimen» jáne beinebaqylaý kameralarymen qamtamasyz etilip jatyr», - dedi Sáken Sársenov Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, elimizdegi mektepterde 137 myńnan astam beinebaqylaý kamerasy ornatylǵan.
«Biz bilim berý mekemelerinde ornatylǵan kameralardy Ishki ister ministrliginiń Jedel basqarý ortalyqtaryna (JBO) tikelei qosamyz. Búgingi kúni elimiz boiynsha 2 026 mektepte ornatylǵan 36 657 beinebaqylaý kamerasyn JBO tikelei baqylap otyr. Jalpy elimizde 7 372 mektep bar (qalalyq – 2159, aýyldyq – 5213), onda 137 myńnan astam beinekamera ornatylǵan. Jyl sońyna deiin barlyq mekteptegi beinebaqylaý júiesin JBO-ǵa tikelei qosyp, qadalaǵalýyna berý josparlanyp otyr. Osy jumystyń qalai júrip jatqanyn baqylaý maqsatynda ótken aptada Aqtóbe qalasyna arnaiy bardym. Osy ýaqytqa deiin elimizde 5 aimaqty tekserip qaittym, qarasha aiynyń sońyna deiin barlyq óńirdi aralap shyǵamyn», - deidi ol.
