Óńir "qyzyl" aimaqqa ótken jaǵdaida qatań karantindik tártip engizilýi múmkin. Odan bólek, shetelde KVI-diń jańa shtammy anyqtalsa, onda shekarany jabý máselesi qarastyrylady, dep habarlaidy Sputnik Qazaqstan.
Ajar Ǵiniiat koronavirýs infektsiiasynyń Qazaqstanda ǵana emes, basqa memleketterde de órship turǵanyn jetkizdi. Osy oraida ministr eger óńir "qyzyl" aimaqqa ótse, onda karantin kúsheitiletinin aitty.
"Qazir infektsiianyń epidemiologiiasy zerttelýde, eger qandai da bir elde koronavirýstyń jańa shtammy anyqtalsa jáne ol bizdiń elde áli jetpese, onda shekarany jabý sharalary qabyldanady", – dedi ministr.
Densaýlyq saqtaý ministrliginiń basshysy bul infektsiianyń tsikldik jáne tolqyndyq aǵymy baiqalatynyn atap ótti.
"Virýs ózgerý ústinde, klinikalyq kórinis te ózgerýde. Qazir dál osy tolqynda "Delta" virýsyndaǵydai ókpege zaqym kelmeidi. Sondyqtan biz infektsiiany baqylaimyz, beiimdelemiz jáne uiymdastyrýshylyq turǵydan emdeýge, sondai-aq infektsiianyń aǵymy men taralýyna bailanysty karantin sharalaryn qarastyramyz", – dep atap ótti Ǵiniiat.
Ministrdiń aitýynsha, karantin sharalaryn qabyldaý jónindegi usynystar vedomstvoaralyq komissiiada qaralady.
"Densaýlyq saqtaý ministrligi sharalar keshenin ázirledi. Vedomstvoaralyq komissiianyń kelesi otyrysynda olar talqylaýǵa shyǵarylady. Shekteý engizý, immýniteti nashar naýqas qyzmetkerlerdi qashyqtan jumysqa aýystyrý, sondai-aq qoǵamdyq oryndarda jáne kólikte maskany mindetteý sharalary qabyldanady", – dep túsindirdi ol.
Vedomstvo málimetinshe, sońǵy aptada aýyrǵan adamdardyń 70 protsenti Almaty (1107 jaǵdai nemese 43,2%-i) jáne Nur-Sultan (576 jaǵdai nemese 22,5%-y) qalalarynda tirkeldi.
"Indetti juqtyrǵandar sanynyń óskenine qaramastan, naýqastardy aýrýhanaǵa jatqyzý deńgeii tómen. 15 shildedegi jaǵdai boiynsha respýblikada statsionarlyq kómek 139 juqpaly aýrýlar aýrýhanasynda kórsetilip jatyr. Olarda naýqastarǵa 3282 oryn jasaqtalǵan. Qazirgi kezde osy aýrýhanalarda 570 naýqas emdelip jatyr", - dedi ministr.
