Vitse-premer – Sý tasqynyna qarsy sharalardy úilestirý jáne qarǵyn sý júrý kezeńiniń saldaryn joiý jónindegi respýblikalyq shtab basshysynyń orynbasary Qanat Bozymbaev jáne tótenshe jaǵdailar ministri Shyńǵys Árinov Qaraǵandy oblysyndaǵy sý tasqyny jaǵdaiyn tekserdi.
Premer-Ministr orynbasary jáne TJM basshysy Qaraǵandy oblysyndaǵy ózen alaptaryn áýeden baqylap, óńirdegi ahýalmen tanysty. Jaǵdai kúrdeli dep baǵalanýda: óńirde sý tasqynynyń ekinshi tolqyny boljanyp otyr. Nura, Osakarov aýdandary aýmaqtarynyń 40%-ynda jáne Aqtoǵai aýdanynyń soltústik bóliginde qar erimegen. Tótenshe jaǵdailardyń aldyn alý úshin sý tasqyny qaýpi bar aýdandarǵa azamattyq qorǵaý qyzmetiniń qosymsha kúshteri men quraldary tartyldy. Barlyq qajetti jumystar júrgizilýde, dambylar nyǵaitylyp, jergilikti atqarýshy organdar men qyzmetter tehnikamen qamtamasyz etildi.
Shtab basshysynyń orynbasary TJ rejimi jariialanǵan Shet aýdanyndaǵy jaǵdaimen tanysty. Tórt aýylda – Qairaqty, Aqsý, Krasnaia Poliana, Deripsalda 40 úige sý kirgen, 292 adam qutqaryldy, olardyń 114-i bala. Qazirgi ýaqytta jaǵdai birshama turaqtalyp keledi, keibir turǵyndar úiine qaityp kelip jatyr.
Qanat Bozymbaevqa sý tasqynynyń aýyr saldarynyń aldyn alý úshin qabyldanǵan sharalar týraly baiandaldy. TJD málimetinshe, eń qiyn kezeń 29-30 naýryzda bolǵan. Qazir sý qoimasy kúsheitilgen rejimde jumys istep tur.
«Nura men Sherýbai-Nuranyń bas jaǵynda qardyń tez erýi basyldy. Qar beti qalyń emes. Nura ózenine qosylyp jatqan artyq sý baiqalmaidy. Qarqaraly jáne Buqar Jyraý aýdandary aýmaqtarynda sý tasqynynyń sharyqtaý shegi ótip ketti dese de bolady», — dep baiandady TJD bastyǵy Murat Qatpanov.
Shtab basshysynyń orynbasary Shet aýdany aýyldarynyń zardap shekken turǵyndarymen kezdesý barysynda sý tasqynynan kelgen barlyq shyǵyndy Komissiia baǵalap, tolyq óteletinin atap ótti.
«Memleket basshysy sý tasqyny zardaptaryn barynsha azaitýdy jáne birinshi kezekte, halyqtyń qaýipsizdigin qamtamasyz etýdi tapsyrdy. Komissiia barlyq úidi tekseredi. Kómek kórsetiledi, múlik qalpyna keltirilip, óteledi. Eger úiler jaramsyz dep tanylsa, jańasy salynady nemese ekinshi naryqtan basqa baspana satyp alynady», — dep túsindirdi Qanat Bozymbaev aýyl turǵyndaryna.
Qazir Shtabtyń basty nazarynda – Nura ózeniniń alaptary. Oblys ákimdigi eldi mekenderdi sý basý qaýpiniń aldyn alý maqsatynda preventivti sharalar qabyldap jatyr. Óz kezeginde Úkimet tarapynan barlyq qajetti kómek kórsetiledi.
Aqmola oblysy men Astana qalasy ákimderine Arshaly jáne Tselinograd aýdandarynda sý tasqynyna qarsy kúshter men quraldar daiyndaý boiynsha tapsyrmalar berildi.
