Elorda ákimi Baqyt Sultanovtyń tóraǵalyǵymen ótken apparat otyrysynda turǵyn úi-kommýnaldyq sharýashylyǵynyń qazirgi jaǵdaiy, tazalyq máselesi kóterildi, dep habarlaidy "Ult aqparat" Elorda Info saityna silteme jasap.
«Búgingi kúni qalanyń barlyq tirshilikti qamtamasyz etý nysandary shtattyq rejimde jumys isteýde. Tótenshe jaǵdai tirkelgen joq. 26 naýryzdan bastap qala boiynsha ekologiialyq ailyq bastaldy. Ótken demalysta bolǵan alǵashqy senbilikte elordada 900 aýla tazartyldy», - dedi qala ákiminiń orynbasary Arman Turlybek.
Onyń deregine súiensek, senbilikke Almaty aýdanynan - 3500, Baiqońyr aýdanynan - 3700, Esil aýdanynan - 3465 jáne Saryarqa aýdanynan 900 adam qatysty.
«Jerasty sý deńgeiiniń kóterilýine, jaýyn-shashynnyń kóbeiýine bailanysty turǵyndardyń kommýnaldyq qyzmetterde túsken shaǵymdary kóbeidi. Atap aitqanda, tek 31 naýryz kúni turǵyndardan 909 shaǵym kelip tústi. Ótken aptanyń ishinde aýdan ákimderi 750 ótinish-shaǵym boiynsha jumys istedi», - dedi ol.
Sonymen qatar A.Turlybek áleýmettik jelilerde qala boiynsha sanitarlyq tazalyqtyń joqtyǵyna qatysty aryz-shaǵymdardyń da kóbeiip otyrǵanyn tilge tiek etti.
«Sondyqtan, Baqyt Turlyhanuly, atalǵan kemshilikterdi joiý maqsatynda aýdan ákimderine tiisti tapsyrmalardy berýińizdi suraimyn. Búgingi kúni qala boiynsha 1842 aýla alańynda 10477 qoqys konteineri ornatylǵan. Qazirgi ýaqytta qoqys shyǵarýǵa qatysty turǵyndardyń shaǵymy kóbeiip ketti. Buǵan qatysty áleýmettik jelilerde jazbalar men fotosýretter dáleli az emes. Munyń sebebi - qoqystyń ýaqytynda tazalanbaýy. Sondai-aq konteinerdiń ózi bos, biraq onyń jan-jaǵy qoqysqa tolyp jatady. Osyndai jaǵdaidyń oryn alýyna tazalyqqa jaýapty merdiger kompaniialardyń tolyq anyqtalmaýy da áserin tigizýde. Osyǵan orai, aýdan ákimderine atalǵan máseleni tezirek sheshý jáne qoqys alańdarynyń tazalyǵyn qadaǵalaý tapsyrmalaryn berýińizdi suraimyn», - dedi Arman Turlybek qala ákimi Baqyt Sutanovqa qarata.
Odan bólek, ákim orynbasary qala jáne qala mańyndaǵy sý tasqynyna qatysty jaǵdaiǵa toqtaldy. Onyń sózine sensek, elordany sý basý qaýpi joq.
Óz kezeginde shahar basshysy Baqyt Sultanov qystan keiin qala qoqysqa tolyp ketkenin atap ótti.
«Kóktem kelip qar erýde. Biraq artynan bar bylyqtary shyǵyp jatyr. Qazir qala tolǵan qoqys pen balshyq, saz. Men osy turǵyda arnaiy mobildi top quryp, tekserýdi tapsyrdym. Sýretten qarańyzdarshy ne bolyp jatqanyn. Osynyń bári jumystyń ýaqytyly atqarylmaýynan. Áitpese, qarajat bar, resýrs bar, qajetti mamandar bar. Aýdan ákimderi qaida qarap otyrsyzdar?»,- dedi ákim.
