Almaty Ortalyq meshitiniń bas imamy Erkinbek Shoqai qasietti Qadir túninde isteýge bolatyn igi jeti amaldy atap ótti, dep habarlaidy NUR.KZ.
Bul tún Alla taǵalanyń uly sózi — Quranǵa arnalǵan tún. Kóptegen zor saýaptarǵa keneltetin myń aidan da haiyrly bolǵan Qadir túninde qandai amal jasaǵan abzal degen saýal árbir musylmannyń oiyna keletini ras. Osyǵan orai, nazarlaryńyzǵa qasietti túnde oryndaýǵa ruqsat etilgen jeti amaldy usynamyz.
Birinshiden, ózińizdiń barlyq kúsh-jigerińizdi salyp Alla Taǵaladan dúnie jáne aqyretińizdi qamtyǵan qajettilikterińizdi suraityn duǵa jasańyz. Sebebi, Rabbymyz bul túni barlyq duǵalardy qabyl etedi. Eń mańyzdysy, bul túni óz otbasyńyzdyń amandyǵy, elimizdiń tynyshtyǵy, memleketimizdiń órkendeýi, dinimizdiń elimizde keń qanat jaiyp, damýyn surap duǵa etýdi esten shyǵarmańyz. Eldiń amandyǵy men tynyshtyǵy – biz ben sizdiń amandyǵymyz ben tynyshtyǵymyz.
Aisha anamyzdan (Oǵan Alla razy bolsyn) Paiǵambarymyzdan (Allanyń Oǵan salaýaty men sálemi bolsyn) bylai dep suraǵany baiandalady: «Ýa, Allanyń elshisi, eger men Qadir túniniń bastalǵany týraly bilsem, ne aitýym kerek?» Ol:
«Allahýmma innáká ǵafýýn, káriimýn. Týhibbýl-ǵafýa faǵfý ǵannii» «Ýa, Alla, rasynda, Sen – Keshirimdisiń, keshirýdi jaqsy kóresiń. Meni keshire gór!», – dep ait», – dedi.
Ekinshiden, Alla taǵalanyń ózińizge bergen kúlli nyǵmetterin esińizge alyp, Oǵan shúkirlik maqsatynda ózińiz biletin barlyq pákteý sózderdi aityp Allany dáripteńiz. (Máselen, Álhamdýllilláh, Sýbhanallah, Allahý Akbar, Láá Ilááhá Illallah t.b.)
Úshinshiden, osy kúnge deiingi barlyq kúnálaryńyz ben qatelikterińizdi esińizge túsirip, Alla Taǵalanyń keshirýin surap duǵa jasańyz. Sebebi, barlyq kúnálardy keshirýshi Jalǵyz Alla ǵana. Sondai-aq, barsha jaqsylyqtar men baqyttyń kilti bolǵan «Astaǵfirýllah» sózin shamańyz kelgenshe kóp qaitalańyz. Sany mańyzdy emes.
Tórtinshiden, 2 rákát bolsa da nápil namazyn oqyp, namazyńyzdyń qabyl bolýyn surańyz. Sol túni kim NÁPIL NAMAZDARDY kóbeitse, 83 jyl 4 ai úzdiksiz nápil namazda bolǵan adam bolasyz.
Besinshiden, shamańyz keletin kólemde sadaqa berińiz jáne sadaqańyzdyń qabyl bolýyn surap Allaǵa jalbarynyp duǵa etińiz. Osy kúni, eger kim SADAQA bergen bolsa, 83 jyl 4 ai úzdiksiz sadaqa bergen bolady.
Altynshydan, Ardaqty Alla Elshisiniń (Oǵan Allanyń igiligi men sálemi bolsyn): «Qiiamet kúni maǵan eń jaqyn bolatyndaryń minezderi eń kórkem bolǵandary», – degen súiinshi hadisti esińizge alyp, minezińizdi jaqsy jaqqa qarai ózgertýge kúsh salyńyz. Sol kúni siz eshkimge aiqailap sóilemei, sabyrly bolyp júrseńiz, 83 jyl 4 ai sabyrly bolǵan adam bolasyz.
Jetinshiden, Paiǵambarymyzdyń (Oǵan Allanyń igiligi men sálemi bolsyn): «Bir-birlerińe syilyq berińder, sonda súiispenshilikteriń artady», - degen sózin esińizge alyp, janyńyzǵa jaqyn adamǵa syilyq usynyńyz. Onyń kólemi mańyzdy emes. Sol kúni kim bireýge syilyq berip, meiirimdilik tanytsa, 83 jyl 4 ai meiirimdilik tanytyp, jaqyn júrgen adam bolasyz.
