Kabýldyń batys bóliginde segiz jetim bala ashtan ólgen. Bul týraly Aýǵanstan hazarlarynyń saiasi jetekshisi, aýǵan parlamentiniń burynǵy múshesi Muhammed Mohakik 24 qazanda Facebook paraqshasyna jazdy, dep habarlaidy Azattyq.
Mohakiktiń málimetine qaraǵanda, Kabýldyń 13-okrýginen birneshe apta buryn tabylǵan balalar denesin jergilikti molda men osy aýdannyń turǵyndary jerlegen.
Molda Muhammed Áli Bámianidiń habaryna qaraǵanda, jetim balalardyń úlkeni - shamamen segiz jasta, kishisi - bir jarym jasta ǵana. "Olardyń eshkimi qalmaǵan. Áke-sheshesiniń ekeýi de ólgen, jaqyn týystary da joq", — deidi Bámiani.
Bámiani balalar denesi tabylǵan úige barǵanyn aitady. Onyń sózinshe, balalardyń ashtyqtan álsiregeni sonshalyq, óz betimen qimyldaýǵa da jaramaǵan.
"Taliban" qozǵalysy basqaratyn aýǵan úkimeti bul jóninde eshqandai aqparat bergen joq.
Buǵan deiin Birikken ulttar uiymy taiaý arada gýmanitarlyq kómek berilmese, Aýǵanstan ashtyqqa urynýy múmkin ekenin eskertken.
