Qazaqstandyq tanymal ázilkesh ári shoýmen Tursynbek Qabatov pen onyń kómekshisi eki jyl buryn Qaraǵandy oblysynda bolǵan jáne adam ólimine ákep soqqan jol apaty boiynsha úkimmen kelispei, appeliatsiiaǵa berdi, dep habarlaidy Sputnik Qazaqstan.
Tursynbek kóz jumǵan azamattyń artynda qalǵan jesirge tiisti somanyń jartysyn – 4 million teńge tóleýi kerek. Sebebi sot ortaq tártipte tólem jasaýdy mindettedi. Talap-aryz boiynsha ótemaqy somasy sáikesinshe 8 million teńgeni qurady.
Sol qaiǵyly oqiǵa bolatyn kúni kólikti aidaǵan onyń kómekshisi óz kinásin moiyndamai otyr. Ol "jábirlenýshi mas kúide qarańǵy ýaqytta jol ortasyna júgirip shyqty" degen ýáj aitýda.
Appeliatsiia Nur-Sultan sot alqasynyń tóraǵasy Ádilhan Shaihislamov pen Murat Soltybaev jáne Alma Esimova sýdialarynyń qatysýmen qaraldy, dep jazdy InBusiness.kz.
"Advokattar sottalýshynyń kinániń dáleldenbeýine bailanysty QR QK 345-baby boiynsha aqtaý jáne QR QK 346-baby boiynsha jazany jeńildetý týraly ótinishin qoldaidy. Sebebi qarańǵy ýaqytta kólik júretin jol bóliginde mas kúide bolǵan jábirlenýshiniń áreketine baǵa berilmegen. Alaida bul sottalýshynyń saldarynan adam ólimine alyp kelgen jol erejesin óreskel buzý boiynsha is-áreketin aqtai almaidy", - dedi Ádilhan Shaihislamov.
Tursynbek Qabatovtyń talap-aryzyn sot alqasy keri qaitardy. Olardyń aitýynsha, azamattyq talap-aryzdar boiynsha durys sheshim shyqqan.
"Moraldyq shyǵyn keltirilgeni úshin jaýapkershilik sottalýshyǵa jáne kólik iesine ortaq tártipte júktelýiniń negizi bar. Qabatov óz kómekshisine kólikti erikti túrde bergen. Iaǵni oǵan kólik quralyn senip tapsyrdy. Sot úkimi ózgerissiz qaldyrylady", - dedi sot alqasy.
Eske salsaq, jol apaty 2019 jyldyń qazanynda Nura aýdanyndaǵy Ahmet aýlynyń mańynda boldy. Lexus markaly kólik mingen Qabatovtyń kómekshisi 34 jastaǵy Erlan Omarqulovty qaǵyp ketti. Ol kóz jumdy.
16 tamyzda elordadaǵy №2 Almaty aýdandyq soty QR 345-babynyń 3-bólimi - jol qozǵalysy erejelerin buzǵany, abaisyzda adam ólimine ákelgeni jáne QR 346-babynyń 1-bólimi kólik júrgizý quqyǵynan aiyrylǵanyna qaramastan, mas kúiinde rólge otyrǵany boiynsha 4 jylǵa bas bostandyǵynan aiyrý týraly úkim shyǵardy.
Sot jesirdiń paidasyna sottalýshy jáne Tursynbek Qabatovtan 8 million teńge óndirý týraly qaýly etti.
Biraz buryn kóz jumǵan azamattyń anasy zattai dáiekter – ulynyń aiaq kiimi men kiiminiń joiylǵany týraly málimdedi.
