Alǵash ret Junior Eurovision-2021 án baiqaýynyń Ulttyq irikteýiniń finalynda eki qatysýshy jeńimpaz atandy. Finalda Beknur Jánibekuly jáne Álinur Hamzin birdei 30,5 paiyz daýys jinady. Endi talantty oryndaýshylar 19 jeltoqsan kúni Parijde ótetin halyqaralyq baiqaýda «Ertegi álemi» ánimen Qazaqstannyń atynan óner kórsetedi. Bul týraly QazAqparat «Habar» Agenttigine silteme jasap habarlaidy.
Ulttyq irikteý jeńimpazdary qazylar alqasynyń baǵalaýy jáne telekórermenderdiń SMS-daýys berý nátijeleri boiynsha anyqtaldy.
Ulttyq irikteý kontsertiniń tikelei kórsetilimi búgin «Habar» telearnasynyń efirinde ótti. 10 finalist tanymal qazaqstandyq kompozitorlardyń arnaiy jazylǵan avtorlyq ánderimen óner kórsetti.
Parijde ótetin 19-shy Junior Eurovision Song Contest balalar án baiqaýyna 19 el qatysady. Olar: Albaniia, Armeniia, Ázerbaijan, Bolgariia, Frantsiia, Grýziia, Germaniia, Irlandiia, Italiia, Qazaqstan, Malta, Niderlandy, Soltústik Makedoniia, Polsha, Portýgaliia, Resei, Serbiia, Ispaniia jáne Ýkraina.
Qazaqstannyń aitýly baiqaýǵa tórtinshi ret qatysýy «Habar» Agenttiginiń 2016 jyldan bastap Eýropalyq habar taratý odaǵynyń qaýymdastyrylǵan múshesi bolyp tabylýynyń arqasynda múmkin boldy.
Alǵash ret Qazaqstan Junior Eurovision baiqaýyna 2018 jyly qatysty. Baiqaýǵa Daneliia Tóleshova «Ózińe sen» ánimen qatysyp, altynshy orynǵa ie boldy. 2019 jyly Erjan Maksim «Armanyńnan qalma» ánimen ekinshi oryn aldy (qazylar alqasynyń sheshimi boiynsha birinshi oryn).
2020 jyly pandemiiaǵa bailanysty balalar Evrovideniesi onlain-formatta ótti. Baiqaýǵa ánder jazba nusqasynda usynyldy. Qazaqstan namysyn qorǵaǵan Qaraqat Bashanova «Forever» ánin oryndap, qazylar alqasy men kórermenderdiń daýys berý qorytyndysy boiynsha 13 qatysýshynyń arasynda ekinshi orynǵa ie boldy.
Ulttyq irikteý transliatsiiasyn osy jerden kórýge bolady.
