Izraildiń Haifa qalasynda týǵanyna 1150 jyl tolǵan uly filosof, ǵalym Ábý Nasyr ál-Farabidiń qurmetine eskertkish taqta ornatyldy, dep habarlaidy "Ult aqparat".
Saltanatty sharaǵa Qazaqstannyń Izraildegi Qurmetti konsýly Devid Liýksembýrg, ǵalymdar, JOO basshylary men BAQ ókilderi qatysty.
Jiyn barysynda Qazaqstannyń Izraildegi elshisi Satybaldy Burshaqov sóz sóiledi.
«Shyǵystyń Aristoteli atanǵan Ábý Nasyr ál-Farabidiń týǵanyna 1150 jyl tolyp otyr. Ol - tek qazaq halqy ǵana emes, álem elderi úshin de ataýly meiram. Sondyqtan, osynaý tarihi qalada uly oishyl atyndaǵy kóshe boiynda eskertkish taqta ornatyldy. Bul - ál-Farabi babamyzǵa degen qurmetimiz», - dedi elshi.
Saltanatty sharaǵa onlain rejimde ál-Farabi atyndaǵy Qazaq ulttyq ýniversitetiniń rektory Ǵalymqaiyr Mutanov ta qatysty.
«Uly babamyzdyń filosofiiasy bizge jáne keler urpaqqa úlken mura. Biz ál-Farabidi taný arqyly álemdi tanimyz. Ál-Farabi atyndaǵy QazUÝ-de uly oishyldyń ósieti arqyly eliizdiń bolashaǵyn, jastardy tárbielep otyrmyz», - dedi ol.
Saltanatty rásimge Halyqaralyq Túrki akademiiasynyń prezidenti, akademik Darhan Qydyráli ál-Farabidiń adamzat rýhaniiatyndaǵy ornynyń erekshe ekenin, sondyqtan tarihi Haifa qalasyndaǵa ǵulamaǵa arnalǵan eskertkish taqta ornatylýy elimiz úshin qurmet ekenin atap ótti.
«Ál-Farabidiń áleýmettik filosof retindegi mańyzy zor. Onyń áigili «Izgi qala týraly» traktaty aldyńǵy urpaqtardyń rýhani-filosofiialyq tájiribesin sińirip qana qoimai, Batys Eýropadaǵy áleýmettik oidyń, ásirese ýtopiialyq filosoftardyń damýyna aitarlyqtai áser etti. Aristotelden keiingi ekinshi ustazdyń atyndaǵy kóshe - dostyqtyń kóshesi bolǵai. Barshańyzdy erekshe qýanyshpen quttyqtaimyn», - dedi Darhan Qydyráli.
Aita keterligi, Izraildiń Haifa qalasynda ál-Farabi atyndaǵy kóshe 1960 jyly ashylǵan.
