Izraildiń burynǵy premer-ministri Biniamin Netaniahý vaktsinanyń úshinshi dozasyn saldyryp otyr. Tel-Aviv, Izrail. 30 shilde, 2021 jyl.
Izraildiń Covid-ke qarsy ekpe saldyrǵan 12 jastan asqan turǵyndary jeksenbiden bastap vaktsinanyń úshinshi dozasyn salǵyza alady. Sarapshylardyń aitýynsha, bul adam immýnitetin nyǵaita túsýge kómektesedi. Bul jóninde Reuters agenttigi habarlady, dep jazady Azattyq.
Munyń aldynda qarttar men sozylmaly aýrýy bar adamdardyń qaita vaktsina salǵyzýyna ruqsat etilgen. Keiin úshinshi doza salǵyzýǵa ruqsaty bar turǵyndardyń jasy tómendei berdi. Sońǵy ret 30-dan asqandardyń bárine qaita ekpe alý múmkindigi berildi.
Izrail densaýlyq saqtaý ministrligi mundai sheshimge eki negiz bar dedi.
Birinshiden, qaita salynǵan vaktsina qatty aýyrǵandar sanyn edáýir azaitqan. Muny eldiń premer-ministri Naftali Bennett te aitty. Ekinshiden, aldyn ala málimetke qaraǵanda, Pfizer ekpesiniń kúshi (Izrail azamattarynyń kóbine osy vaktsina salynǵan) ekinshi vaktsinany salǵannan jarty jyl ótken soń tómendei bastaidy. Izrailde ekpe saldyrǵandar arasynda koronavirýspen aýyrǵandardyń kóbeiýine osy jait ta sebep bolǵan.
Qazir Izrail turǵyndarynyń 20 paiyzy, iaǵni 2 milliondai adam vaktsinanyń úshinshi dozasyn alǵan.
Amerika Qurama Shtattary da buryn tolyq vaktsina alǵan azamattaryna ekpeniń úshinshi dozasyn salatynyn jariialady. Degenmen, eki elde de halyqtyń biraz bóligi (Izrailde – halyqtyń 20 paiyzy, AQSh-ta – 40 paiyzy) áli múlde ekpe saldyrmaǵan. Bul elderde Covid-ke qarsy vaktsina salý mindetti emes.
Izrail, AQSh jáne Eýropanyń kei elinde koronavirýspen aýyrǵandardyń qaita kóbeiýine ekpe saldyrmaǵandar arasynda asa juqpaly "delta" shtamynyń taralýy sebep deidi sarapshylar.
Izrail – turǵyndaryna koronavirýsqa qarsy ekpeni jappai salýdy alǵash bastaǵan elderdiń biri. Naýqandy jeltoqsanda bastaǵan Izrail birneshe aida eresek turǵyndarynyń jartysyna vaktsina salyp úlgerdi. Al jańadan koronavirýs juqtyrǵandar sany kúrt azaidy. Indet órshigen tusta elde táýligine 10 myńdai adam koronavirýs juqtyrsa, bul kezderi ondaǵan adamnan ǵana virýs tabylyp jatty.
Alaida "delta" shtamy taraǵaly beri virýs juqtyrǵandar qaita kóbeidi.
