Elimizdiń ýaqytsha ustaý izoliatorlary men tergeý bólmelerine videokameralar ornatylady. QR Ishki ister ministrliginiń resmi ókili Nurdildá Oraz vedomstvonyń onlain brifingisinde osyndai málimet berdi, dep habarlaidy QazAqparat.
«Búginde jergilikti politsiia qyzmetin servistik model qaǵidattaryna aýystyra otyryp, reformalaý boiynsha tásilder ázirlendi. Memleket basshysy penitentsiarlyq mekemelerde jáne politsiianyń qyzmettik ǵimarattarynda, quqyq qorǵaý organdarynyń barlyq jedel-tergeý bólimshelerinde jappai beinebaqylaýdy engizýdi tapsyrdy.
Bul politsiiaǵa halyq aldynda ashyq jumys isteýge múmkindik berip, sybailas jemqorlyq táýekelderin azaitady», - dedi Nurdildá Oraz.
Onyń sózine qaraǵanda, Batys Qazaqstan oblysynda atalǵan beine júielerdi montajdaý jáne ornatý jumystary tolyq aiaqtalǵan.
«Politsiia departamentiniń 26 ákimshilik ǵimaratynda halyqpen jumys júrgiziletin úi-jailarda 254 videokameralar ornatylǵan.
Politsiia departamentiniń ózinde 22 beinekamera, kóshi-qon qyzmetinde 2 kamera ornatyldy. Oral qalasynyń politsiia basqarmasynda qyzmetkerlerdiń jumysyn 39 kamera, Abai qalalyq politsiia bóliminde 17 kamera, Zachagansk bóliminde – 6 kamera baqylaidy.
Beinemonitoring júiesimen ýaqytsha ustaý izoliatorlary, oblys ortalyǵynyń 24 ýchaskelik politsiia pýnktteri qamtylǵan. 19 aýdandyq politsiia bólimshesinde 119 kamera ornatyldy.
Politsiianyń qyzmettik keńistikterin, sondai-aq barlyq jedel-tergeý bólimshelerin beinekameralarmen jaraqtandyrý aǵymdaǵy jyly búkil el boiynsha qalalyq, aýdandyq jáne kenttik politsiia bólimderin eskere otyryp aiaqtalady», - dedi ministrliktiń resmi ókili.
