Italiiada koronvirýstyń Delta nusqasynyń taralýymen bailanysty Covid-19-yń tórtinshi tolqyny bastaldy. Sol sebepti 6 tamyz, jumadan bastap azamattar mádeni jáne oiyn-saýyq oryndaryna barý úshin «green pass» Covid-ruqsatnamasyn kórsetý kerek bolady, dep habarlaidy The Local saity.
Certificazione verde nemese Covid sertifikaty koronavirýsqa qarsy tolyq vaktsina alǵandarǵa nemese sońǵy alty ai ishinde virýspen aýyrǵandarǵa, sonymen qatar sońǵy 48 saǵat ishinde koronavirýsqa test tapsyryp, teris nátije kórsetkenderge beriledi.
6 tamyzdan bastap Italiianyń kóptegen kásiporyndary men mádeni nysandary zań boiynsha kirer kezde sertifikat talap etýi kerek.
Sertifikat 12 jastan asqan adamdarǵa murajailarǵa, galereialarǵa, teatrlarǵa, kinoteatrlarǵa, sport stadiondaryna, taqyryptyq saiabaqtarǵa, jabyq basseinderge, spa-ǵa, sportzaldarǵa jáne barlar men meiramhanalardaǵy ashyq demalys oryndaryna barǵan kezde qajet.
Osy talapty buzǵany úshin klientter de, kásiporyndar da 400-1 000 eýro kóleminde aiyppul tóleidi.
Italiia úkimeti qonaqúilerge, sýpermarketterge nemese saýda ortalyqtaryna kirý kezinde sertifikat kórsetýge qatysty basqa josparlar týraly habarlaǵan joq.
Sonymen qatar el biligi ishki saparlar jasaityn qoǵamdyq kólikterde, alys jerlerge baǵyt alatyn poiyzdarda, mektepter men jumys oryndarynda Covid-sertifikatyn engizý týraly máseleni qarastyryp jatyr.
EO jáne Shengen aimaǵynan, AQSh-tan, Kanada pen Japoniiadan kelgen týrister Italiianyń sertifikat talap etiletin jerlerine óz elinde berilgen uqsas meditsinalyq qujattardy kórsetý arqyly bara alady.
Italiia úkimeti Ulybritaniia men Izrail turǵyndaryna berilgen uqsas meditsinalyq qujattardy moiyndaitynyn málimdedi.
