Jerorta teńizinde 40 kún bolyp, Daniia eliniń kemesine otyrǵyzylǵan migranttar tobyna Italiiadan túsýge ruqsat etildi, dep habarlaidy VVS agenttigi.
Arasynda júkti áiel bar 27 migrant Liviiadan 2 tamyz kúni attanǵany atap ótiledi. Migranttar otyrǵan qaiyq sýǵa bata bastaǵan soń, Daniia eliniń jaqyn mańda júzgen Maersk Etienne tankerine otyrǵyzyldy. Tanker teńizde bir aidan kóp ýaqyt júzdi. Senbi kúni keshke keme Italiianyń Sitsiliia jaǵalaýyna toqtaýǵa ruqsat aldy. Sondai-aq, migranttar Mediterranea Saving Humans úkimettik emes uiymy usynǵan qutqarý kemesine otyrǵyzylyp, odan keiin Potstsalo ailaǵyna jiberilgen.
Mediterranea Saving Humans Twitter-degi paraqshasynda bul oqiǵany «eýropalyq teńizde júzý tarihynda eń uzaq jáne abyroidan jurdai etken jaǵdai boldy» dep sipattaǵan.
Grekiiada bosqyndarǵa arnalǵan Moriia lageri órtengen soń, 12 myńnan astam bosqyn panasyz qalǵany habarlanyp otyr.
Reuters agenttigi byltyr Italiia jaǵalaýyna 5200 migrant tússe, biyl olardyń sany shamamen 19400 adam bolǵanyn atap ótti.
BUU málimetterine sáikes, Eýropa jaǵalaýyna túsken migranttardyń jalpy sany 40 myń adamdy quraǵan, sonyń ishinde 400-den astam adam qaza tapqan nemese iz-tússiz joǵalǵan. Eýropalyq komissiia biylǵy jyldyń 30 qyrkúieginde immigratsiia týraly jańa kelisimdi tanystyrýǵa daiyndalý ústinde.
