Jyl basynan beri Qarjylyq monitoring agenttigi IIM jáne Shekara qyzmetimen birlesip janar-jaǵarmai materialdaryn el aýmaǵynan zańsyz shyǵarýdyń 712 áreketiniń jolyn kesti, dep habarlaidy ult.kz.
Munai ónimderiniń zańsyz ainalymy men kontrabandasy faktileri boiynsha 8 sotqa deiingi tergep-tekserý bastaldy.
Máselen, Mańǵystaý oblysynda 2022 jyldan beri esepke alynbaǵan 28,5 myń tonnadan astam munaidy óńdegen zańsyz shaǵyn munai óńdeý zaýytynyń qyzmeti áshkerelendi. Óndirilgen ónim mazýt retinde rásimdelip, shetelge shyǵarylǵan.
Túrkistan oblysynda memlekettik shekara astynan arnaiy qazylǵan tonnel arqyly Ózbekstan Respýblikasyna benzin kontrabandasyn uiymdastyrǵan transulttyq qylmystyq toptyń zańsyz qyzmeti toqtatyldy. Atalǵan is boiynsha kináli tulǵalar uzaq merzimge bas bostandyǵynan aiyryldy.
Sonymen qatar, Qyrǵyz Respýblikasyna AI-92 markaly benzindi zańsyz tasymaldaýmen ainalysqan qylmystyq topqa qatysty tergeý aiaqtaldy. Zańsyz shyǵarylǵan janarmai kólemi 190 myń tonnadan asyp, onyń quny 37 mlrd teńgeden joǵary bolǵan.
Kezekti zańsyz tasymaldaý áreketi kezinde «Túrksib» stantsiiasynda shamamen 500 tonna benzin tielgen 8 temirjol tsisternasy ustaldy. Quny 138 mln teńge bolatyn tárkilengen benzin memleket kirisine ainaldyryldy.
Eldiń ekonomikalyq qaýipsizdigin qamtamasyz etý jáne janar-jaǵarmai tapshylyǵyna jol bermeý maqsatynda Agenttik munai ónimderin zańsyz tasymaldaý shemalaryn anyqtaý jáne jolyn kesý jumystaryn júieli túrde jalǵastyrýda.
