Irannan kelgen qandastar Soltústik Qazaqstan oblysyna jaiǵasty, dep habarlaidy «Habar 24». 20 otbasy «Eńbek» baǵdarlamasy boiynsha Esil jáne Shal aqyn aýdandaryna qonys aýdarǵan. Qazir jańa úige kirdi. Kópshilik atajurtqa oralǵan aǵaiyndy «aqsarbas» aityp qarsy aldy.
Sur bult. Dymqyl tuman. Qońyr kúz. Soltústik Qazaqstan qandastardy kúnniń sýyǵymen qarsy alsa da, jyly shyrai tanytty.
Tarihi Otanyna tabany tigenderdiń biri – Najib Qazaq. Tórt balanyń ákesi. Egiz qyzdaryna 4-aq ai bolypty. Iranda týyp ósken qandas baýyrymyzdyń qýanyshynda shek joq. Búgin ańsaǵan ata qonysynan úi alyp jatyr.
Najib Qazaq, qandas: – Keremet sezimdemin. Qýanyp turmyn. Óz jerimdi kórip, óz ata-babalarymnyń topyraǵyna kelip qatty qýanyshtymyn. Kelinshegim de qatty qýanyshty. Sosyn, inshalla, qalǵan ómirimdi osy jerde ótkizemin dep arnaiy keldim. Ózim ózime syimai turmyn.
Bir qaýym qandas Nikolaevka aýylyna qonystandy. Olarǵa «Eńbek» baǵdarlamasy boiynsha salynǵan jańa úiler berildi. Basqa da jaǵynan qoldaý bolady.
Edil Tutqyshev, Esil aýdany ákiminiń orynbasary:
– Kelgen qandastarymyz mynaý memlekettik «Eńbek» baǵdarlamasyna legip jatyr. Ár otbasyna 204 myńnan sýbsidiia alynady. Jáne de 500 myńnan asa grant kómek bastapqy kómek alý múmkinshilikteri bolady.
Soltústik Qazaqstan oblysyna Irannan 20 otbasy – barlyǵy 60 adam kóship keldi. Olardyń arasynda muǵalim, tiginshi, qurylysshy sekildi taǵy basqa mamandyq ieleri bar. Kósh toqtamaidy.
Arman Súiindikov, Dúniejúzi qazaqtary qaýymdastyǵynyń SQOF jetekshisi:
– Iranda qazirgi ýaqytta 10 myń etnikalyq qazaq turady. 1 myń 500 otbasy sol jaqta turady. Gorgan, Búrji qalalarynda kóp qazaq turady. Olardyń da kelgileri keledi.
Olar úshin jańa ómir bastaldy. Kóz ashqaly qar jaýmaityn Iranda turǵan qandastarymyz búgin birinshi ret pesh jaǵyp jatady. «Atamekenniń kúni de ystyq, túni de ystyq», – deidi olar.
