Foto: gov.kz
Almatyda “jeńil tabys” ýádesine sengen ondaǵan azamat iri qarjylyq shyǵynǵa ushyrady. Qarjylyq monitoring agenttiginiń qalalyq departamenti «Boxy Wealth» atty qarjy piramidasyn uiymdastyrý isi boiynsha tergeýdi aiaqtady, dep habarlaidy Ult.kz.
Tergeý derekterine sáikes, kúdikti bir jyl boiy Almaty aýmaǵynda jobanyń qurylymdyq bólimshesin basqarǵan. Júie arnaiy sait pen messendjerler arqyly jumys istegen. Aldymen «Kúndelikti tabys» chatynda halyq tutynatyn taýarlar jaily aqparat taratylyp, keiin paidalanýshylar investitsiialyq platformaǵa tartylǵan.
Jobaǵa qatysý úshin azamattarǵa túrli “paketterdi” satyp alý usynylǵan. Onyń esesine kúnine 5–10% tabys ýáde etilgen. Sonymen qatar jańa qatysýshylardy shaqyrǵandarǵa bonýs beretin referaldyq júie iske qosylǵan.
Qarajattar jeke tulǵalardyń bank shottary arqyly qabyldanyp, keiin P2P operatsiialarmen kriptovaliýtaǵa aýdarylyp otyrǵan. Senim týdyrý úshin kompaniia resmi tirkelip, keńse ashyp, jarnama júrgizip, jalǵan “tabys kórsetkishterin” kórsetken.
Nátijesinde 78 azamat 110 mln teńgeden astam qarjysynan aiyrylǵan.
Kúdikti qamaýǵa alynyp, sot sheshimimen onyń Almatydaǵy jer ýchaskesine tyiym salyndy. Qylmystyq is sotqa joldandy.
Qarjylyq monitoring agenttigi azamattardy investitsiialyq usynystarǵa saqtyqpen qaraýǵa shaqyryp, kez kelgen jobanyń zańdylyǵyn muqiiat tekserýdi eskertti.
Aita keteiik, buǵan deiin Almatyda «NBC TV» ataýymen belgili taǵy bir qarjy piramidasyna qatysty is qozǵalǵan bolatyn.
