Almaty qoǵamdyq keńesiniń músheleri men ministrler Ile Alataýy tabiǵi ulttyq parkinde týristerdiń qaýipsizdigin qamtamasyz etý máselesin talqylady, dep habarlaidy "Ult aqparat".
Búgin Ile-Alataýy tabiǵi ulttyq parkindegi 35 gektar jerdi jalǵa alǵan «Kýltaý i K» JShS direktory Aleksandr Gýjavinniń qatysýymen qoǵamdyq keńestiń onlain otyrysy ótti.
Aita keteiik, Aleksandr Gýjavin jalpy kólemi 35 ga bolatyn Úlken Almaty, Kishi Almaty, Kamen, Talǵar, Kókbastaý, Túrgen orman sharýashylyǵy aýmaǵyn paidalanýǵa alǵan. Tenderlik komissiianyń sheshimimen №1 lot jeńimpazy bolyp «KÝLTAÝ i K» JShS tanylǵan bolatyn.
Jeke investor barlyq qatysýshylardy jańa jobamen tanystyrdy. Onyń aitýynsha, joba tabiǵatty qorǵaýǵa, qoljetimdilikti, jailylyq pen qaýipsizdikti qamtamasyz etýge kómektesedi.
«2019 jylǵa jasalǵan taldaýǵa nazar aýdarsaq, týrister taýda eki kún saiyn adasyp ketetin. Iaǵni bir jylda 180 adam. Meniń oiymsha, bul - taý úshin óte kóp», - deidi Aleksandr Gýjavin.
Sonymen qatar ol volonterler tarapynan usynylǵan erekshe ideiany atap ótti.
«Bizde bir qyzyq jaǵdai boldy. Sivers alma aǵashyn otyrǵyzǵan kúni alty ai buryn taýda joǵalyp ketken qyz tabyldy. Ol taýǵa jalǵyz ketken eken. Sodan keiin Ásel atty volonter qarapaiym bastama jasady. Mundaǵy árbir ortalyqta jýrnal bolýy kerek.Taýǵa baratyn týristerdiń barlyǵy osy jýrnalǵa tirkelýi tiis. Onda adamdar qai baǵytta kimmen bara jatqany týraly tolyq aqparat qaldyrady. Bul - respýblikalyq jedel- qutqarý jasaǵy úshin úlken kómek bolmaq»,– dedi ol.
Óz kezeginde QR Ekologiia, geologiia jáne tabiǵi resýrstar vitse-ministri Erlan Nysanbaev qaýipsizdik máselesinde shet elderdiń tájiribesi de zerttelgenin aitty.
«Biz munyń barlyǵy shetelde qalai uiymdastyrylǵanyn kórdik. Negizgi shart - jaqsy oilastyrylǵan baǵyttardy qurý nemese uiymdastyrý. Biz Amerikadaǵy birneshe ulttyq parkte boldyq. Siz jai ǵana kez kelgen jerde júre almaisyz. Oǵan ruqsat joq. Barlyq týristik baǵyttar qaýipsizdik erejelerimen qamtamasyz etilgen. Týristerdiń óz betinshe qalaǵan jaǵyna ketýine jol bermeý úshin zańmen retteý kerek shyǵar. Bul - qaýipsizdikti qamtamasyz etýdiń basty sharttarynyń biri», - dep tolyqtyrdy E. Nysanbaev.
