QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń keńeitilgen májilisi aiasynda gýmanitarlyq bilim salasynda qazaq tilindegi 100 oqýlyq tanystyryldy, dep habarlaidy QazAqparat.
«Ulttyq aýdarma biýrosy» atqarǵan «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda aýdarylǵan 100 oqýlyqtyń árqaisysy 10 myń danamen basyp shyǵaryldy. Qazaq tiline aýdarylǵan kitaptar barlyq oqý oryndaryna, sonyń ishinde jeke menshik ýniversitetterge de taratyldy.
«Dúniedegi eń ozyq oqý oryndarynyń baǵdarlamasyna kirgen ǵylymi ádebiet, akademiialyq bestseller eńbekter qazaq tiline aýdaryldy. Olar buǵan deiin álemniń ondaǵan tiline aýdarylyp, ilgeri damyǵan qoǵamdarda milliondaǵan tirajben taraǵan. Bizdiń de oqytýshylar men stýdentterdiń osyndai mazmunǵa qol jetkizýi úlken olja. Bul, qajet deseńizder, «Bolashaq» baǵdarlamasynyń aýqymy keń jalǵasy. «Bolashaq» baǵdarlamasynyń arqasynda bizdiń 20 myńdai stýdentimiz álemniń aldyńǵy qatarly ýniversitetterinen bilim aldy. Al endi óz elimizde oqityn jarty million qazaqstandyq stýdent sol Kembridj, Oksfordtyń, Garvardtyń úzdik oqýlyqtarymen qazaq tilinde bilim alýǵa múmkindik aldy», – dedi keńeitilgen májilis barysynda QR Memlekettik hatshysy Qyrymbek Kósherbaev.
Ol 100 jańa oqýlyqtyń arqasynda qoǵamdyq sana úshin asa mańyzdy birqatar gýmanitarlyq bilim salasynyń mazmuny túbegeili túrde jańartylǵanyn basa aitty.
«Kóp jaǵdaida áli de taptyq, formatsiialyq, ideologiialyq sipatta baiandalyp kelgen filosofiia, tarih, áleýmettaný, saiasattaný, zań men quqyqtaný, jýrnalistika, mádeniet jáne ónertaný, til bilimi, shyǵystaný, ádebiet teoriiasy, pedagogika jáne psihologiia sekildi ǵylymdar pánaralyq, órkeniettik jáne gýmanistik baǵyttaǵy jańa mazmunǵa ie boldy», - dedi ol.
