Búgin QR Premer-ministriniń orynbasary Gúlshara Ábdiqalyqova bastaǵan jumys toby Batys Qazastan oblysyna jumys saparymen bardy, dep habarlaidy "Ult aqparat" Baq.kz agenttigine silteme jasap.
Jumys tobynyń quramynda QR Eńbek jáne halyqty áleýmettik qorǵaý ministri Berdibek Saparbaev, Bilim jáne ǵylym ministri Kúlásh Shámshidinova, Densaýlyq saqtaý ministri Eljan Birtanov, Orman sharýashylyǵy jáne janýarlar dúniesi komitetiniń tóraǵasy Qaiyr Ryskeldinov pen Qurylys jáne turǵyn úi-kommýnaldyq sharýashylyq isteri komitetiniń tóraǵasy Marhabat Jaiymbetovter bar. Áleýmettik blog boiynsha birinshi basshylardan quralǵan jumys toby eń aldymen Elbasynyń «Áleýmettik qamqorlyq» jańa áleýmettik sharalaryn iske asyrý boiynsha aqparattyq-túsindirý jumystaryn júrgizýdi kózdeidi.
Vitse-premer bastaǵan top aldymen halyqqa qyzmet kórsetý ortalyqtarynyń jumysymen tanysty.
Oraldaǵy ortalyqtardyń tutynýshylary tsifrlandyrý igiligin kórip otyr. Byltyr Batys Qazaqstan oblysyndaǵy halyqqa qyzmet kórsetý ortalyqtary 1 million 200 myńnan astam memlekettik qyzmet kórsetken. Olardyń basym bóligi elektrondy formatta rásimdelgen. 200 myńdai óńir turǵyny elektrondy tsifrlyq qoltańba alsa, egov portalyndaǵy 752 memlekettik qyzmet túriniń 506-sy qoljetimdi.
Budan keiin Úkimet músheleri jumyspen qamtý ortalyǵynda boldy. Munda vitse-premer telegramm kanalyndaǵy kópbalaly otbasylarmen keri bailanys ornatýdy qamtamasyz etetin jobamen tanysty.
Gúlshara Ábdihalyqova bastaǵan jumys toby budan keiin oblystyq máslihat zalynda turǵyndarmen kezdesti. Premer-ministr orynbasary óz sózinde Úkimet músheleriniń óńirlerdi aralaýynyń basty maqsaty – az qamtylǵan otbasylardyń tynys-tirshiligin kózben kórip, qordalanǵan máselelerdiń sheshilýine tikelei atsalysý ekendigin atap ótti. Jiynǵa kelgen kópbalaly analar da ózderin tolǵandyrǵan saýaldarǵa jaýap aldy.
Jurtshylyqpen júzdesýler kezinde Memleket basshysynyń «Nur Otan» partiiasynyń XVIII sezinde alǵa qoiǵan tapsyrmalary túsindirilip, halyqtyń ál-aýqatyn kóterýge baǵyttalǵan qarjynyń qalai igeriletini jóninde aqparat berildi.
«Osyǵan orai Úkimet músheleri túsindirý jumystaryn batys óńirlerden bastady. Keshe Atyraý oblysynda bolsaq, búgin Batys Qazaqstanǵa kelip otyrmyz. Bizdiń basty maqsatymyz -turǵyndarǵa túsindirýmen qatar jergilikti jerde másele bolsa, sony qarastyrý, sheshý. Basty ózgeristerdi úsh topqa bólip aitsaq, sonyń birinshisi - eń kómekke muqtaj, kópbalaly otbasylarǵa qolushyn berý. Sonymen qatar eń tómengi ailyq tabysy bar azamattardy qoldaý erekshe mańyzdy. Sonyń ishinde biýdjettik salada jumys jasaityn qyzmetkerler de bar. Ekinshiden, baspanamen qamtýdy jaqsartý, sondai-aq meditsinalyq, bilim berý qyzmetteriniń sapasyn kóterý. Úshinshi, óńirlerdi damytý. Buǵan jergilikti jerlerde jol salý, aýyz sýmen, elektr qýatymen qamtý máseleleri kiredi. Biz osy máselelerdi tolyq túsindire otyryp, halyqtyń usynys-pikirlerine qulaq asyp, jergilikti jerlerde olarǵa qyzmettiń qalai kórsetilip jatqanymen tanysamyz», - dedi Gúlshara Ábdiqalyqova.
Aita keterligi, Batys Qazaqstan oblysynda kópbalaly jáne múgedek bala tárbielep otyrǵan 21 myńdai otbasy ataýly áleýmettik kómek alatyndar sanatynda. Úkimet basshylary bul rette halyqtyń az qamtylǵan toptaryn qoldaý jáne tabysty arttyrýǵa barynsha kúsh salynatynyn airyqsha atap ótti. Memlekettiń qoldaýy ásirese kiristeri tómen azamattardyń turǵyn úi máselelerin sheshýden de kórinis tappaq. Aqjaiyq óńirinde búgingi tańda 2700 páterlik 20 kópqabatty úidiń qurylysy júrip jatyr. Aýyldyq eldi mekenderde jyl sońyna deiin 70 shaqty baspana paidalanýǵa beriledi. 2025 jylǵa deiin óńirde 8 jarym myńdai otbasy baspanamen qamtylmaqshy.
Bilim berý isinde ilgerileýshilikter bar. Aimaqta apatty jaǵdaidaǵy jáne úsh aýysymda bilim beretin mektepter máselesi túbegeili sheshimin tabar kún alys emes. Shilde aiynda oblystaǵy bilim berý salasy qyzmetkerleriniń jalaqysy 30 paiyzǵa óspekshi. Memleket basshysynyń óńirlerdi keshendi damytýǵa baǵyttalǵan tapsyrmalary densaýlyq saqtaý salasynan da kórinis tabady.
Desek te, halyqty tolǵandyrǵan kúrmeýli máselelerdiń biri – baspanaǵa qatysty. Prezident tapsyrmasyna sáikes, elimizde «Nurly jer» baǵdarlamasy aiasynda 40 myńǵa jýyq páter salynýy tiis.
«Arenda júiesindegi bul páterler áleýmettik jaǵynan az qamtylǵandarǵa beriledi. Bul úshin 7 jyl qatarynan 50 mlrd teńge bólinbek. Kópbalaly men tolyq emes otbasylarǵa, múgedek balasy bar adamdar úshin turǵyn úi nesiesin TÚQJB arqyly 3-5 paiyzben berýdi tapsyramyn. Ol úshin TÚQJB-ǵa qosymsha qarjy kerek», - degen bolatyn Memleket basshysy.
Bul rette Oral qalasy boiynsha 19 myńdai adam jalǵa beriletin turǵyn úi kezeginde tur. Biyl osy sanattaǵylar úshin 800 páterlik 4 úidiń qurylysyn bastaý kózdelgen.
Jumys toby sapar barysynda eń negizgi 3 baǵytqa kóńil bólindi. Ol birinshiden, eń muqtaj azamattarǵa, az qamtylǵan otbasylarǵa kómek berýdiń jai-japsaryn túsindirý. Ekinshiden, baspana máselesin sheshý boiynsha qolǵa alynǵan naqty jumystar retin talqylaý. Úshinshiden, óńirlik damý múmkindikterin saralaý. Iaǵni, joldar, aýyzsý jáne elektr energiiasymen qamtamasyz etý baǵytyndaǵy jumystardyń barysyn pysyqtaý.
Sondai-aq, sapar barysynda Bilim jáne ǵylym ministri Kúlásh Shámshidinova, Densaýlyq saqtaý ministri Eljan Birtanov bastaǵan top músheleri qaladaǵy jáne Bórli, Terekti aýdandaryndaǵy bilim berý men densaýlyq saqtaý uiymdaryn aralap kórdi. Atalǵan sala qyzmetkerlerimen kezdesýler ótkizip, Memleket basshysy tarapynan júktelgen mindetterdiń aýyldyq jerlerde júzege asyrylý múmkindigimen tanysty.
Sonymen qatar, búgin Orman sharýashylyǵy jáne janýarlar dúniesi komiteti men Qurylys jáne turǵyn úi-kommýnaldyq sharýashylyq isteri komitetiniń tóraǵalary da óz salalary boiynsha nysandardy aralap, eńbek ujymdarymen kezdesti.
Úkimet músheleri erteń kópbalaly jáne az qamtylǵan otbasylardy aralap, oblystyń Báiterek, Tasqala jáne Terekti aýdandarynda bolady dep josparlanyp otyr.
Aita ketý kerek, Premer-ministrdiń orynbasary buǵan deiin óz áriptesterimen birge Atyraý oblysynda bolǵan edi. Jumys sapary aldaǵy ýaqytta Aqtóbe, Mańǵystaý jáne elimizdiń ózge de óńirlerinde jalǵaspaq.
