Atyraýda QR Premer-Ministriniń orynbasary Gúlshara Ábdiqalyqova bastaǵan úkimettik komissiianyń sapary jalǵasýda, dep xabarlaidy "Ult aqparat" Óńirlik kommýnikatsiialar qyzmetine silteme jasap.
Búgin Qazaqstan Respýblikasy Premer-Ministriniń orynbasary Gúlshara Ábdiqalyqova Atyraý oblysyna jumys sapary barysynda turǵyn úi qurylysy alańyna bardy.
«72 páterdiń birinshi blogyn iske qosý 2019 jyldyń naýryzyna josparlanǵan. Shildede turǵyn úi kesheniniń qurylysy tolyǵymen aiaqtalady. Turǵyn úi meditsinalyq qyzmetkerlerge, memlekettik qyzmetkerlerge, memlekettik biýdjet qarajaty esebinen ustalatyn uiymdardyń qyzmetkerlerine beriletin bolady», - dedi Atyraý oblysynyń qurylys basqarmasynyń bastyǵy Malik Amanov.
Odan keiin Gúlshara Ábdiqalyqova azamattardy jumyspen qamtý ortalyǵynyń jumysymen tanysty.
Búgingi kúni ortalyq zamanaýi tehnikalyq quraldarmen jabdyqtalǵan. Jumyssyzdarǵa arnalǵan qujattardy qabyldaý elektrondy kezektiń jańa standarttaryna sáikes júzege asyrylady. Jumyssyzdar úshin kompiýterlik saýattylyq bólmesi ashyldy.
«Ótken jyly oblysta 24 674 adam jumyspen qamtyldy, onyń ishinde 16 666 adam turaqty jumysqa ornalasty. TJK-niń benefitsiarlarynyń ishinde jumyspen qamtý boiynsha 1005 adam qamtyldy», - dep habarlady jumyspen qamtý ortalyǵynyń direktory Gúlnár Quspanova.
Qazaqstan Respýblikasy vitse-premeri Gúlshara Ábdiqalyqovanyń aitýynsha, búgingi tańda Qazaqstannyń barlyq qalalarynda kópbalaly analardy jumysqa ornalastyrý úshin jaǵdai jasalýda.
Máselen, Aqtóbede tálimgerlik óte jaqsy damyǵan, mamandyǵy boiynsha maman árbir ana úshin jeke oqytýdy qamtamasyz ete alady.
«Atyraýda jaqynda «Isker ana» jobasy iske qosyldy, onda áielderge bastaýysh mamandyq beriledi, qaita daiarlaý da ótkiziledi», - dedi Gúlshara Ábdiqalyqova.
Halyqqa qyzmet kórsetý ortalyǵynda Gúlshara Ábdiqalyqova halyqqa kórsetiletin memlekettik qyzmet týraly baiandaldy.
«Ortasha alǵanda, HQKO aýmaǵyna táýligine 4,5 myń adam, qalada 2,5 myńnan astam adam keledi. 2018 jyldyń birinshi jartyjyldyǵynda ortalyq qyzmetkerleri múmkindigi shekteýli adamdarǵa memlekettik qyzmetter kórsetti, bul rette biryńǵai bailanys ortalyǵyna 2437 ótinim kelip tústi», - dedi HQKO direktory Turlan Nurjanov.
QR Premer-Ministri orynbasarynyń sapary Atyraý memlekettik ýniversitetiniń Stýdentter úiinde jalǵasty. Bul jerde az qamtylǵan otbasylardan shyqqan stýdenttermen kezdesý ótti.
«QazTransOil» AQ-nyń burynǵy ǵimaraty «5 áleýmettik bastamany» júzege asyrý sheńberinde ótken jyldyń sońynda ýniversitetke aýysty. Búgingi kúni aýyldyq jerlerdegi oqýshylar yńǵaily jaǵdaida, sonyń ishinde jetim jáne úlken jáne tolyq emes otbasylardaǵy balalar turady. Sonymen birge, Stýdentter úiinde 450 adam ornalasady.
«Oblysta stýdenttik jataqhanalarda oryn tapshylyǵyn joiý boiynsha keshendi baǵdarlama ázirlendi. Búginde bizdiń aimaqta 100 oryndyq eki stýdentter jataqhanasy salynady. Qosymsha bes jataqhana qurylysynyń jobalyq-smetalyq qujattary ázirlendi. Eki jyl ishinde Atyraý oblysynda 700 orynǵa arnalǵan jeti stýdent jataqhanasyn salýdy josparlap otyrmyz», - dedi Atyraý oblysynyń ákimi Nurlan Noǵaev.
Úkimet komissiiasynyń jumys saparynyń birinshi kúni kásiporyn basshylary, kásipodaq uiymdary jáne úshjaqty komissiialarmen kezdesýmen aiaqtaldy. Is-shara barysynda Atyraý oblysynyń ákimi kásipkerlerdi joǵary jáne orta oqý oryndarynyń stýdentteri men túlekterin jumysqa ornalastyrýǵa baǵyttalǵan «Jastar tájiribesi» memlekettik baǵdarlamasyna belsene qatysýǵa shaqyrdy.
«Byltyr oblystyń kásiporyndarynda jastar praktikasynan ótkenderdiń 70% jumysqa ornalastyryldy. Biyl biz kompaniialar men uiymdardyń basshylaryn jastardy jumyspen qamtýǵa shaqyramyz, memleket olarǵa jalaqy tóleidi », - dep qorytyndylady Nurlan Noǵaev.
Kezdesýdi qorytyndylai kele, Qazaqstan Respýblikasynyń Eńbek jáne áleýmettik damý ministri Berdibek Saparbaev pen Qazaqstan Respýblikasy vitse-premeri Gúlshara Ábdiqalyqova biznes kóshbasshylardy óńirdegi jumyssyzdyqty boldyrmaý, qyzmetkerlerdiń qysqartylýyn boldyrmaý jáne shetel kapitaly bar kásiporyndardaǵy otandyq jumysshylardyń sanyn kóbeitýge shaqyrdy.
