Foto: Oqý-aǵartý ministrligi
Ishki ister ministri Marat Ahmetjanov biyl qańtarda qaitys bolǵan senator Gúlmira Kárimovanyń ólimin tekserý is-sharalaryna qatysty pikir bildirdi, dep habarlaidy QazAqparat.
Búgin Senattyń jalpy otyrysynan keiin tilshiler ministrden Sotqa deiingi tergep-tekserýlerdiń biryńǵai tiziliminde depýtat Gúlmira Kárimovanyń ólimine qatysty derekti tirkeý jáne osy boiynsha qylmystyq is qozǵaý jaiynda surady.
«Elimizde Sotqa deiingi tergep-tekserýlerdiń biryńǵai tizilimi aiasynda derekter qamtylady. Osy oraida kez kelgen aryz tirkeledi. Adam ólimine qatysty arnaiy zertteýler men saraptamalar qamtylady», - dedi Ahmetjanov.
Onyń aitýynsha, atalǵan is-qimyldardy júzege asyrý úshin Sotqa deiingi tergep-tekserýlerdiń biryńǵai tiziliminde tirkeledi.
«Eshqandai qylmystyq is qozǵalmady. Bul derek Sotqa deiingi tergep-tekserýlerdiń biryńǵai tiziliminde bar. Ol boiynsha tekserý júrgizilip jatyr, sondai-aq ólim sebebin anyqtaý maqsatynda sot-meditsinalyq saraptama eskerilgen. Osynyń barlyǵy qalypty rásim sanalady. Iaǵni, kez kelgen aryz tirkelip, ol boiynsha tiisti tekserý júrgiziledi. Ólim sebebi anyqtalmasa, saraptama jasalady, al Sotqa deiingi tergep-tekserýlerdiń biryńǵai tiziliminde tirkeýsiz saraptama júrgizý múmkin emes», - dedi ministr.
Eske salaiyq, 27 qańtarda senator Gúlmira Kárimova kenetten qaitys boldy.
Oǵan aldyn ala «anafilaktikalyq shok» diagnozy qoiylǵan edi.
Degenmen keiin Astana qalalyq qoǵamdyq densaýlyq saqtaý basqarmasy 45 jasynda kóz jumǵan Gúlmira Kárimovanyń ólimine júrek talmasy sebep bolǵanyn málim etti.
