Tbiliside qazaqtyń ulttyq taǵamdaryn usynatyn meiramhana ashyldy, dep habarlaidy «Habar 24»
Grýziiada turatyn Qazaqstan azamattary bul jańalyqty qýana qabyldap, áleýmettik jelilerde bólisip jatyr. Olar bul meken jyraqta júrgen jerlester bas qosatyn orynǵa ainaldy dep jazýda.
Tbiliside kóptegen ult pen din ókilderi turady. Otanynan alysta bolǵandyqtan, ulttyq taǵamdarynyń dámin saǵynatyny túsinikti.
Qalada italiialyq, ýkrainalyq jáne ózbek dámhanalary bar. Al jaqynda qazaq meiramhanasy da ashyldy. Aita keter bir jait, onda aspazshy bolyp grýzin áieli jumysy isteidi.
«Túrli dámhanalarda istedim, livandyq, ýkrainalyq, grýziialyq. Qazaq meiramhanasy ashylatynyn estip, osynda jumysqa ornalasýǵa keldim. Jańa taǵamdardy tanyp bilýdi unatamyn. Osynda meni qazaq aspazshy úiretti. Bul Grýziia taǵamdarynan erekshe: qoi men jylqy eti, jalpy kóp mólsherde et pen piiaz salady. Maǵan unaidy»,- deidi aspazshy Nino Kýrkýnýli.
Meiramhanany Qazaqstannan kelgen úsh jas adam ashty. Ulttyq taǵamdarynyń dámin saǵynǵandyqtan, osyndai qadamǵa barǵanyn aitady. Grýziiada kezdespeitin ónimdi, mysaly jylqy eti Qazaqstannan ákelinedi.
«Bul dámhanany eń aldymen Grýziiada turatyn qazaqtar úshin ashtyq. Olardan basqa jańa taǵamdarǵa qyzyqqan jergilikti turǵyndar kóptep keledi. Olarǵa qazaqsha et pen baýyrsaqtar óte unaidy. Mantyny ózderiniń ulttyq taǵamy - hinkalimen salystyrady. Ashylǵanyna eki-aq ai ótse de, meiramhana tabysty jumys istep keledi», - deidi qazaq meiramhanasynyń iesi Erkesh Baimuhambet.
