Foto: Getty Images
Gonkongtegi turǵyn úi kesheninde bolǵan alapat órt saldarynan qaza tapqandar sany 44 adamǵa deiin ósti. Bul týraly Qytaidyń arnaiy ákimshilik aýdanyn basqaratyn Djon Li 27 qarasha kúni tańerteń ótken baspasóz máslihatynda málimdedi, dep habarlaidy Ult.kz.
Buǵan deiin 36 adamnyń qaza tapqany, 279 adamnyń joǵalǵany habarlanǵan. Bilik ókilderiniń dereginshe, 29 adam aýrýhanaǵa jetkizilgen, onyń ishinde jeteýiniń jaǵdaiy aýyr.
Órt sársenbi kúni qalanyń soltústigindegi Tai Po aýdanynda bastalyp, bambýktan jasalǵan qurylys qańqalary arqyly tez taralyp, birneshe biik turǵyn úilerge jaiylǵan. Órt sóndirýshilerdiń málimetinshe, Wang Fuk Court turǵyn kesheniniń segiz korpýsynyń keminde beseýi órttiń oshaǵynda qalǵan.
Qaza tapqandardyń arasynda bir órt sóndirýshi bar. Ol órtti sóndirý kezinde bailanyssyz qalyp, keiin denesinde kúiik jaraqattarymen tabylǵan.
Bilik bul oqiǵaǵa eń joǵary — besinshi deńgeidegi qaýiptilik sanatyn berdi. Gonkongta mundai deńgei 2008 jyldan beri alǵash ret tirkelip otyr.
Órttiń naqty sebebi anyqtalyp jatyr. Degenmen jergilikti turǵyndar buǵan deiin qurylys nysanynda jumys isteitin jumysshylardyń temeki shegetinine shaǵymdanǵan. South China Morning Post basylymy politsiianyń kezdeisoq adam óltirý baby boiynsha úsh adamdy ustaǵanyn habarlady.
QHR tóraǵasy Si Tszinpin qaza tapqandardyń otbasylaryna kóńil aitty jáne Gonkong biligine órttiń zardabyn azaitý úshin barlyq sharany qabyldaýdy tapsyrdy.
Gonkong — álemdegi eń biik ári halyq tyǵyz ornalasqan turǵyn úileri bar qalalardyń biri. Buryn qalada ólimge ákeletin órtter jii tirkeletin. Alaida sońǵy onjyldyqtarda qaýipsizdik sharalary kúsheitilip, mundai aýqymdy órtter siregen.
