HBO telarnasynyń sholýshysy Rikardo Selis Vesti.kz portalyna bergen suhbatynda Orta salmaqta WBA (Super), IBO, WBC jáne IBF tujyrymdary boiynsha álem chempiony qazaqstandyq boksshy Gennadii Golovkinge (37-0-1, 33 KO) 5 mamyrda meksikalyq Saýl "Kanelo" Alvarestiń ornyna qarsylas tabý qiyn bolatynyn aitady.
4 sáýirge aýysqan túni meksikalyq boksshy Saýl "Kanelo" Alvarestiń (49-1-2, 34 KO) jekpe-jekterin uiymdastyratyn Golden Boy Promotions kompaniiasy arnaiy baspasóz jiynyn uiymdastyrdy. Onda "Kanelonyń" orta salmaqtaǵy WBA Super, WBC, IBF jáne IBO tujyrymdary boiynsha álem chempiony Gennadii Golovkinmen (37-0-1, 33 KO) 5 mamyr kúnine Las-Vegasta josparlanǵan ekinshi kezdesýdiń ótpeitini belgili boldy. Bul baspasóz jiynyn soń Golovkin de óz pikirin aityp, qandai jaǵdai bolmasyn 5 mamyrda sharshy alańǵa shyǵatynyn aitty.
"Golovkin men Alvarestiń qarsylasýy qate bolmady. Bular qazirgi ýaqyttaǵy boks álemindegi eń tanymal esimder. Olardyń ekinshi jekpe-jegi bolmaityny ókinishti. GGG "Kanelosyz" qiyn bolady. Endi oǵan jaqsy bir qarsylas tabý kerek. Bul - ońai sharýa emes. Meksikalyqtyń ornyna tek Billi Djo Sonders jaraidy, alaida ulybritaniialyq boksshy qolynyń jaraqatyna bailanysty sharshy alańǵa shyǵa almaidy", - deidi Selis.
Qazirgi ýaqytta otandasymyzben kezdesý ótkizýge birneshe boksshy daiyn ekenin aitty. Olardyń qatarynda amerikalyq boksshylar Djermall Charlo, Demetriýs Andrade, ýkrainalyq Sergei Derevianchenko, irlandiialyq Geri O'Sallivan, braziliialyq Iamagýchi Falkao, ekinshi orta salmaqtaǵy WBO chempiony Hilberto Ramires jáne kishi Hýlio Sezar Chaves bar.
Sondai-aq "Kanelo" jekpe-jekten bas tartqannan soń Sonders te Golovkindi jekpe-jekke shaqyrdy. Ol qazaqstandyq boksshyny barlyq belbeý úshin jekpe-jek ótkizýdi usyndy.
17 jáne 20 aqpan kúnderi Alvarestiń Meksikada tapsyrǵan doping-synamasynan klenbýterol dárýmeni tabyldy. Meksikalyq boksshynyń komandasy bul dárýmenniń buzylǵan et arqyly túskenin aityp aqtalýda.
Naýryz aiynda Alvares jattyǵý lagerin San-Diegoǵa (AQSh, Kaliforniia shtaty) aýysytyp, taǵy úsh doping synaq tapsyrdy. Olardyń barlyǵy taza shyqty. Biraq Nevada shtatynyń Atletter komissiiasy (NSAC) ýaqytsha ony jekpe-jekterden shettetti. Alvarestiń isine bailanysty tyńdalyp endi 18 sáýir kúni ótedi. Eger boksshynyń kinási anyqtalsa, ol bir jylǵa deiin shettetilýi múmkin.
4 sáýirde Golden Boy promoýterlik kompaniiasynyń prezidenti Erik Gomes Alvares pen Golovkin arasyndaǵy ekinshi kezdesý báribir de 2018 jyly ótetinine úmitti ekenin aitty.
Golovkin men Alvares arasyndaǵy birinshi kezdesý 16-qyrkúiek kúni Las-Vegastaǵy T-Mobile sport kesheninde ótip, teń aiaqtalǵan bolatyn. Biraq bul nátijege kóptegen boks jankúierleri men mamandary qarsy bolǵan edi.
