Ulybritaniialyq ǵalymdar COVID-19-dyń "delta" nusqasyna qarsy Pfizer-BioNTech, Oxford-AstraZeneca jáne Moderna kompaniiasy shyǵarǵan vaktsinalar tiimdiligine zertteý júrgizdi, - dep habarlaidy Tengrinews.kz Oksford ýniversiteti saityna silteme jasap.
Ulttyq statistika basqarmasy (ONS) jáne Densaýlyq saqtaý jáne halyqqa qyzmet kórsetý departamenti (DHSC) seriktestigimen júrgizilgen zertteý nátijesi boiynsha, Pfizer-BioNTech jáne Oxford-AstraZeneca vaktsinalary "delta" shtamynan jaqsy qorǵaidy, biraq olardyń tiimdiligi "alfa" shtamyna qarsy qorǵanysymen salystyrǵanda tómendegen.
Zertteýler "delta" Ulybritaniiada basym shtamǵa ainalǵan 2021 jyldyń 17 mamyryna deiin jáne odan keiingi tiimdilik nátijelerin salystyrǵan. Ǵalymdar 1 jeltoqsannan 16 mamyrǵa deiin 18 jastan asqan 384 myńnan asa adamnyń 2,6 millionǵa jýyq PTR-synamasyn jáne 17 mamyr men 1 tamyz aralyǵynda 360 myńǵa jýyq adam tapsyrǵan 810 myńnan asa synama nátijesin taldaǵan.
Zetteý nátijesi virýs juqtyryp, jazylǵannan keiin vaktsina alǵan adamdar buryn koronavirýs juqtyrmai ekpe alǵan adamdarǵa qaraǵanda joǵary qorǵanysqa ie bolǵanyn kórsetken.
Zertteýden alynǵan basqa da mańyzdy nátijeler:
- Moderna vaktsinasynyń bir dozasy basqa vaktsinalardyń bir rettik dozasy siiaqty "deltaǵa" qarsy tiimdi nemese tiimdirek;
- Pfizer-diń eki dozasy virýs juqtyrýǵa qarsy joǵary tiimdilikke ie, biraq tiimdilik AstraZeneca-nyń eki dozasyna qaraǵanda tez tómendeidi;
- Tórt-bes aidan keiin eki vaktsinanyń tiimdiligi uqsas, biraq zertteýshiler uzaq merzimdi áserden qorǵaýdy zertteý kerek deidi;
- Dozalar arasyndaǵy interval infektsiianyń aldyn alý tiimdiligine áser etpeidi, biraq jastar egde jastaǵy adamdarǵa qaraǵanda vaktsina alǵanda joǵary qorǵanysqa ie bolady.
"Vaktsinatsiia COVID-19 juqtyrý múmkindigin tómendetse de, ony joia almaidy. Eń bastysy, bul málimet vaktsina alǵan adamdardyń COVID-19-dy basqalarǵa juqtyrý áleýetin jáne aýrýdy azaitý úshin testileý men oqshaýlanýdyń mańyzdylyǵyn kórsetedi", - dedi Naffildtegi Oksford ýniversitetiniń qoǵamdyq densaýlyq saqtaý bóliminiń aǵa ǵylymi qyzmetkeri Koen Paýells.
Aita keteiik buǵan deiin Resei Federatsiiasynyń densaýlyq saqtaý ministri Mihail Mýrashko "Spýtnik V" vaktsinasynyń "delta" shtamyna qarsy tiimdiligi shamamen 83 paiyz dep málimdedi.
