Immýnitetti kúsheitý úshin qus, jylqy etiniń sorpasyn iship, jumyrtqa jeý kerek. Mundai keńesti meditsina ǵylymynyń doktory, professor Erbolat Dálenov berdi, dep habarlaidy QazAqparat.
«Koronavirýs infektsiiasy — bizdiń elimizge de jetken indet. Infektsiia barlyq jerde júrip jatyr. Sondyqtan odan saq bolýymyz, ózimizdi saqtaýymyz kerek. Keibir adam munyń qaýpin jete túsinbei «mundai aýrý joq, saiasat» dep júr. Bulai aitýǵa bolmaidy. Óitkeni, qazirdiń ózinde dúniejúzinde 9 mln adam aýyryp, onyń 480 myńǵa jýyǵy qaitys boldy. Elordamyzda da kúsheiip bardy. Sondyqtan halqyma aitarym, ózderińizdi, gigienalyq rejimdi saqtańyzdar. Qoldy kir sabynmen jýyp, muryn ishin de osy sabynmen tazalańyzdar. Qol berip amandaspańyzdar. 1-1,5 metr áleýmettik araqashyqtyq saqtańyzdar. Sonda bul virýs juqpaidy», - dedi professor.
Sonymen qatar, ol ár adam koronavirýs infektsiiasynan qorǵanýy úshin óziniń immýnitetin kúsheitýi qajettigin basa aitty.
«Immýnitetti kúsheitý úshin durys tamaqtaný qajet. Aqýyzy kóp tamaq tutynǵan jón. Qus, jylqy eti sorpasyn iship, jumyrtqa jegen jaqsy. Óitkeni, olar qan quramynda immýnoglobýlindi kóbeitedi. Sondyqtan kúndelikti tutynatyn taǵamnyń 30-40 paiyzy qus pen mal eti, al qalǵan 60-70 paiyzy jemis-jidek bolýy tiis», - dedi Erbolat Dálenov.
Meditsina ǵylymynyń doktory sál tymaýratyp qalǵan kezde 1 litr qainaǵan sýǵa 1 qasyq as sodasyn salyp, onyń býymen kúnine úsh ret tynys alý kerektigin aitady. Sonymen qatar maska ishine spirt shashylǵan kishkene dáke salyp, ony 3 saǵat saiyn aýystyryp otyrýǵa keńes beredi.
