Senbi kúni Gaitide bolǵan jer silkinisinen qaza tapqandar sany 1 419-ǵa jetti, 7 myńǵa jýyq adam jaraqattandy.
Bul týraly dúisenbi kúni memlekettik telearna efirinde respýblikanyń azamattyq qorǵaý basqarmasy málim etti, dep habarlaidy TASS agenttigi.
«Qazirgi kezde azamattyq qorǵaý basqarmasy 1 419 qaza tapqan adamdy tirkedi: olardyń 1 133-i - Ońtústik departamentinde, 162-si - Grand-Ans, 122-si Nipp jáne ekeýi Soltústik-batys departamentte anyqtalǵan. Sonymen qatar biz 6,9 myńnan asa adamnyń túrli jaraqattar alǵanynan habardarmyz», - dep málimdedi vedomstvo ókili.
Bilik derekteri boiynsha, óńirdegi 37 myńǵa jýyq ǵimarat tolyǵymen nemese jartylai qiraǵan, qazirgi kezde qutqarýshylar úiindilerdiń astynan adamdardy izdestirýde.
Senbi kúni tańerteń Gaitide 7,2 baldyq jer silkinisi boldy. Zilzala oshaǵy shamamen 125 myń halqy bar Le-Ke kommýnasynan 40 shaqyrym jerde ornalasqan, tereńdigi – 10 km. Qatty zardap shekken departamentter qatarynda Ońtústik, Grand-Ans jáne Nipp departamentteri bar. Úkimet bir aiǵa tótenshe jaǵdai ornatty.
