Gaitide 14 tamyzda bolǵan jer silkinisinen qaza bolǵandardyń sany 2 189 adamǵa jetti, taǵy 12 myńnan astam adam jaraqat aldy.
Bul týraly sársenbi kúni respýblikanyń azamattyq qorǵanys basqarmasynan málimdedi, dep habarlaidy "Ult aqparat" TASS aqparat agenttigine silteme jasap.
Vedomstvo taratqan málimetke sáikes, Ońtústik departamentinde - 1 832 adam, Grand-Ans departamentinde - 218 adam, Nipp departamentinde - 137 adam jáne Soltústik-Batys departamentinde eki adam qaza boldy. Sondai-aq jaraqat alǵan 12 268 adam tirkeldi. Aimaqta 100 myńnan astam ǵimarat tolyq nemese jarym-jartylai qiraǵan. Qazirgi kezde qutqarýshylar úiindiler astynan adamdardy izdeýdi jalǵastyryp jatyr.
Eske sala keteiik, 14 tamyz tańda Gaitide magnitýdasy 7,2 jer silkinisi boldy. Zilzala epitsentri 125 myńǵa jýyq turǵyny bar Le-Ke kommýnasynan 40 shaqyrym jerde ornalasqan, tereńdigi - 10 shaqyrym. Jer silkinisi saldarynan Ońtústik, Grand-Ans jáne Nipp departamentteri qatty zardap shekti.
El úkimeti bir aiǵa tótenshe jaǵdai rejimin engizdi.
Gaitide qýatty jer silkinisinen keiin «Greis» tropikalyq daýyly bastaldy. Ol jer silkinisinen zardap shekkenderge kómek kórsetý jáne tiri qalǵandardy izdeý jumystaryn qiyndatty.
Gaiti 2010 jyly 200 myńnan astam adamnyń ómirin qiyp áketip, bir jarym million adamdy panasyz qaldyrǵan jer silkinisinen keiin áli esin jiǵan joq. Tipti, eldegi prezident saraiy da áli qalpyna keltirilmegen.
