Qazaqstandyq «Ordabasy» (Shymkent) komandasy fýtboldan aldaǵy eki jylǵa eýrokýbok oiyndarynan shettetildi, dep habarlaidy UEFA resmi saity.
Bul sheshim komandanyń qarjylyq fair play (FFP) talaptaryn saqtamaýy saldarynan týyndap otyr. Ol 2020/21 jáne 2021/22 jyldardaǵy kezeńderge qatysty.
2021 jyldyń 31 qańtaryna deiin klýb óziniń merzimi ótken kreditorlyq bereshegi joq ekenin dáleldegen jaǵdaida qatań talap alynyp tastalady.
Aita ketsek, UEFA tarapynan komandaǵa 2019 jyldyń 30 qyrkúieginde aiyppul salynǵan edi.
Biyl el birinshiliginde «Ordabasy» úshinshi oryn aldy. Ol komandaǵa aldaǵy jyly Eýropa ligasy irikteý kezeńine qatysýǵa múmkindik týǵyzdy.
UEFA dál osyndai jaǵdaiǵa bailanysty Sloveniianyń «Olimpiia» (Liýbliana) jáne Serbiianyń «Tsrvena Zvezda» (Belgrad) komandalaryna aiyppul saldy.
Aldaǵy jyly Qazaqstan atynan Eýropa chempiondar ligasyna elordalyq «Astana» komandasy qatyssa, Eýropa ligasynda Almatynyń «Qairaty», Qyzylordanyń «Qaisary» el namysyn qorǵaityny belgili. Endi «Ordabasyny» qai komanda almastyratyny anyqtalmaq.
Shymkenttik klýb 2018 jyly dál osyndai jaǵdaiǵa tap bolǵan edi. Sol kezeńde «Ordabasy» ornyna eýrokýboktyq irikteý oiyndaryna Qostanaidyń «Tobyly» qatysqan-tyn.
