Fýtboldan Qazaqstan quramasy 2020 jylǵy Eýropa chempionaty irikteý kezeńin jeńispen bastady. Olar búgin óz alańynda Shotlandiiadan 3:0 esebimen basym tústi, dep habarlaidy QazAqparat tilshisi.
Esterińizge sala ketelik, búgin 2020 jylǵy Eýropa chempionaty irikteý kezeńindegi I tobyndaǵy alǵashqy týr oiyndary bastaldy. Alǵashqy týrda bizdiń jigitter Shotlandiiany quramasyn qabyldady. Aita keterligi, Shotlandiia bizdiń quramanyń jalpy búginge deiin kezdesken alpys altynshy, Eýropadaǵy otyz jetinshi qarsylasy bolyp otyr.
Jankúierler Shotlandiia quramasy jaiynda jaqsy biledi. Ótken jyldary olar álemdik dodalarda jii boi kórsetip júrdi. Alaida sońǵy kezeńde atalmysh qurama álem jáne qurlyq chempionaty finaldyq kezeńine shyǵa almai keledi. Aitalyq, olar álem chempionatynda 2002 jyldan beri baq synaýdan shet qalyp júrse, Eýropa úzdikteriniń qatarynda 2000 jyldan bastap boi kórsetken joq. Degenmen irikteý kezeńderinde óz tobynda joldamaǵa qol sozym jerde qalyp qoiatyn.
Alǵashqy minýttan bizdiń qurama sapynda Dmitrii Nepogodov, Ǵafýrjan Súiimbaev, Temirlan Erlanov, Sergei Malyi, Evgenii Postnikov, Ian Vorogovskii, Islambek Qýat, Aleksandr Merkel, Iýrii Pertsýh, Baktiior Zainýtdinov jáne Roman Mýrtazaev shyqty. Al Shotlandiia quramynda Skott Bein, Liam Palmer, Grem Shinni, Skott Makkena, Devid Beits, Kallým Makgregor, Djon Makginn, Djeims Forrest, Stiýart Armstrong, Oliver Berk, Oliver Makberni boldy.
Oiyn basynda Shotlandiia quramasy shabýylǵa kóbirek shyǵýǵa kóńil bóldi. Degenmen bizdiń jigitter de qarymta shabýyl uiymdastyrýǵa nazar aýdardy. Osylaisha olar alǵashqy minýttarda qarsylastar qaqpasynan sańylaý taýyp ketti. I tobyndaǵy alǵashqy goldy bizdiń jigitter soqty. Oiynnyń 6-minýtynda Gollandiianyń «Herakles» komandasynda oinaityn Aleksandr Merkel áriptesi Iýrii Pertsýhqa ádemi pas shyǵaryp berdi. Mundai múmkindikti Iýrii qur jibersin be? Esep ashyldy. Arada tórt minýt ótkende bizdiń jigitter esepti ústemelei tústi. Bul joly qurama kapitany Islambek Qýat jeke sheberliginiń arqasynda Ian Vorogovskiige gol soǵatyn múmkindik jasady. Qarsylastar qaqpasyna taǵy bir gol soǵyldy. Esep 2:0. Qazaqstan quramasy basymdyǵyn arttyra tústi. Sálden soń Islambek Qýattyń alystan tepken dobyn shotland qaqpashysy Skott Bein syrtqa áreń shyǵardy. Birinshi kezeńde qos quramada da budan basqa esepti ózgertetin sátter bolǵan edi. Degenmen tablodaǵy esep ózgere qoiǵan joq.
Ekinshi kezeńde qarsylas qurama ózderiniń beker kelmegenin ańǵartyp, bizdiń qaqpaǵa qarai shabýylǵa shyǵýǵa kóńil bóldi. Degenmen oilaǵanyn júzege asyra alǵan joq. Esesine bizdiń jigitter taǵy bir gol soǵyp ketti. Ǵafýrjan Súiimbaevtyń sol qanattan áýelete bergen dobyn búginde Reseidiń «Rostov» komandasynda oinap júrgen Baktiior Zainýtdinov baspen qaqpanyń oń jaǵyna baǵyttady. Oǵan Skott Bein tosqaýyl qoia alǵan joq. Esep 3:0. Qazaqstan quramasy osylaisha óz jankúierlerine Ulystyń Uly kúni - Naýryz merekesine tolaiym tartý jasady.
Bizdiń qurama endi 24 naýryzda Resei quramasyn qabyldaidy. Dál osy kúni atalmysh topta Kipr men Belgiia, San-Marino men Shotlandiia quramalary kezdesedi.
Qazaqstan sońǵy ret óz alańynda 2018 jyldyń 16 qazanynda Andorra quramasyn 4:0 eesbimen jeńgen edi. Bul Ulttar ligasynyń irikteý kezeńi bolatyn.
Búgin I tobynda taǵy eki oiyn bolady. Atap aitqanda, Kipr men San Marino, Belgiia men Resei quramalary kezdesedi. Oiyndar elorda ýaqytymen 00.45-te bastalady.
